Fraccion di MAS cu sosten di Accion 21 a manda un carta na e Presidente di Parlamento mr. Edgard Vrolijk cu e peticion di yama Minister di Enseñansa y Deporte, sr. Endy Croes, pa e presenta na Parlamento.
Segun nos constitucion, art. 23 inciso 1 ta stipula cu gobierno ta responsabel pa enseñansa. Den e caso di Stichting Katholiek Onderwijs Aruba (SKOA), ta gobierno su responsabilidad di subsidia e fundacion pa di e forma aki garantisa cu e 8500 alumno cu ta atendiendo un scol cu ta cay bou di SKOA por ricibi educacion.
Minister Endy Croes como esun responsabel pa enseñansa di Gabinete Wever-Croes II, tin e deber di duna Parlamento di Auba un splicacion amplio tocante e implicacionnan cu e decision di hues di dia 23 di januari ultimo tin pa e sistema di enseñansa di Aruba, particularmente pa e alumno-y empleadonan di SKOA. Tambe pa e mandatario splica extensamente tocante e plan di accion di gobierno con lo atende cu e debe astronomico di belasting cu fundacion SKOA (mas cu 6 miyon te september 2022) tin cu Pais Aruba.
