Vakantie grandi pocopoco ta yegando su final. Den dos siman mayoria mucha na Aruba ta bayendo bek scol. Aunke tur mucha kier disfruta di nan delaster dia di vakantie, ta sumamente importante pa nos cumisa prepara pa bay bek scol. Esaki ta encera e organisacion pa asina tur cos ta cla pa bo yiu bay scol, alabes preparacion na cas pa asina bo yiu por beneficia mas tanto cu ta posibel di nan educacion.
Organisacion pa scol:
Traha un budget y traha un lista di tur loke bo yiu falta ainda pa bay bek scol. Esaki ta hacie mas facil p’abo como mayor ora mester bay cumpra acticulo di scol. Envolve bo yiu den e preparacion y haci esaki algo placentero.
Preparacion na cas:
Evita warda te cu e anochi prome cu scol habri pa bo yiu drumi trempan. Lag’e custuma di drumi trempan un pa dos siman prome cu nan prome dia di scol. Segun American Academy of Pediatrics, mucha bou di 6 aña mester drumi 11 ora tur anochi y mucha di scol basico mester drumi 9.5 pa 10.5 ora. Alabes, percura pa prepara un luga trankilo na unda bo yiu por concentra y traha su huiswerk.
Importancia di un rutina:
Crea un rutina di mainta y purba mantene esaki diariamente. Siña bo yiu pa ta independiente. Esaki lo beneficia boso como famia a lo largo. Un bon rutina di mainta ta cumisa for di e anochi prome cu un bon sosiego. Purba custuma bo yiu pa drumi y lanta rond di e mesun orario tur dia. Laga bo yiu desayuna bon tur mainta prome cu e bay scol. Tene bon na cuenta cu e trafico di mainta pa asina evita stress.
Corda envolve bo mes como mayor den e educacion di bo yiu. Yud’e cu su tareanan di scol y papia cu ne tocante e importancia di un educacion. Cada mucha ta diferente, pues no compara ningun mucha su desaroyo cu esun di un otro. Al contrario, demostr’e cuanto bo stim’e y con orguyoso bo ta di su desaroyo y su logro.
