Riba 23 di april Fundacion Pa Nos Muchanan (FPNM) a organisa su di seis Dia Pedagogico dirigi principalmente pa profesionalnan trahando den Centro di Cuido y Guia di Mucha na Aruba (Crèche y traimerdia). Dia Pedagogico ta un dia di estudio y tin como meta pa eleva conocemento di esunnan cu ta ofrece cuido na nos muchanan.
Tema di e aña aki ta, “Reconoce Mi, Compronde Mi, Yuda Mi unda lo a enfoca riba aspectonan di salud mental y trastornonan mental cu muchanan ta experencia.
Segun articulo 23 di e Tratado Internacional di derechonan di mucha, tur mucha cu tin un inhabilidad tin derecho riba cuido adapta na su inhabilidad. Mirando e hecho cu e trahado pedagogico tin un tarea sumamente importante y responsabilidad grandi, ta importante pa nan tin conocemento pa por reconoce e diferente aspectonan di salud mental y trastornonan mental cu muchanan por haya. Esaki ta importante pa asina e trahado pedagogico (TP) por brinda e mucha e cuido adapta na su necesidad y cu e tin derecho ariba.
Mirando cu e trahado pedagogico ta forma un parti grandi den e mucha su bida. Mayoria mucha ta pasa mas tempo na Crèche cu su mayornan pa motibo cu mayornan mester traha. Pa e motibo aki ta asina importante pa e TP por tin e habilidad di reconoce, compronde y yuda e muchanan na un manera positivo y efectivo. Cada trahado pedagogico di e Centro di Cuido y Guia di Mucha hunto cu mayornan ta forma e base firme pa e muchanan den e Centro.
A duna Dia Pedagogico e aña aki na un forma diferente. Mirando e medidanan pa cu e pandemia, Dia Pedagogico 2021 a duna por medio di un ‘Webinar’ unda mas of menos 233 participante a sigui e programa via ‘Zoom.’ Pa motibo cu e aña aki a organisa un Webinar pa Dia Pedagogico, tabata tin hasta profesionalnan di Boneiro, Corsou y Sint Maarten cu a participa. Ademas, algun studiantenan for di Hulanda a logra participa den e Webinar pa engrandece nan conocemento riba e tema aki.
E dia a cuminsa cu un motivational video unda ta enfoca riba e importancia di e rol di un educador den e bida di un mucha.
Despues di esaki a sigui cu un introduccion chikito di e Team di FPNM unda a yama bon bini na tur participantenan, un splicacion cortico di e proposito di Dia Pedagogico y un splicacion di e programa di dia.
Cinco diferente workshops a wordo duna relaciona cu e tema, entre otro;
- “ADHD” duna pa Johnny Boekhoudt,
- “Spectrum di Autismo” duna pa Carolina Span,
- “Taalontwikkelingstoornis” duna pa Kristel van Nes,
- “Hechtingsprobleem” duna pa Naziha Wever-Ras,
- “Ansiedad y Depresion” duna pa Raymicheline Raymond.
Cada workshop a enfoca riba e caracteristicanan di cada aspecto di salud mental of trastorno mental, teoria tras di cada topico, con pa reconoce nan, con pa guia un mucha, herment pa implementa esaki den practica, con pa trata cu mayornan di e mucha, y na cua instancia nan por acudi pa haya mas informacion. Despues di cada workshop a tene un sesion di Q&A unda e participantenan tabata tin e oportunidad pa haci nan pregunta(nan) na e orador.
FPNM ta felicita e Centronan di Cuido y Guia di Mucha cu a participa na Dia Pedagogico 2021 y tambe gradici e cabesante y mayor di e muchanan di e Centronan pa nan cooperacion pa asina e trahadonan pedagogico por a forma parti di e dia di estudio aki.
Un danki ta bay na tur profesionalnan y studiantenan cu tambe a participa na nos Dia Pedagogico 2021.
FPNM ta gradici Layhing de Kort cu a fungi como MC pa e evento, High Performance cu a yuda cu e parti tecnico di e Webinar, tambe e instructornan pa nan tremendo trabao durante e evento.
Por ultimo FPNM kier a informa e diferente Centronan cu pa 2022, FPNM lo bolbe organisa Dia Pedagogico un bes mas y ta spera nan tur cu e mesun entusiasmo.
