Desde 4 di mei a cuminsa reactiva e economia interno y a anuncia cu companianan di construccion por cuminsa opera bou cierto condicionnan. Esaki ta aregla den articulo 2.1 di e decreto ministerial traha specificamente p’e crisis cu Aruba ta den dje actualmente. E articulo 2.1 ta bisa cu ta permiti pa traha na proyectonan di construccion y trabounan di mantencion na edificionan existente.
Yolanda Pronk, Fiscal di Ministerio Publico a bisa di tin cu cumpli cu e siguiente rekisitonan. No tin mas di 15 persona presenta na e luga di trabou y tambe e contratista tin un declaracion di aprobracion di DOW. pa bin na remarca pa un declaracion di aprobacion, e contratista mester registra su mes y e proyecto di construccion of renobacion na DOW.
Tambe e tin cu entrega DOW e cantidad di trahado y nan identidad. Si ta trata di trahadonan cu ta depende di permiso di estadia, e contratista tin cu entrega DOW e copianan di nan estadia cu tin e numbernan CRV di DIMAS. Si un proyecto no tin un bouwvergunning, no lo duna un aprobacion na e contratista. E fiscal a bisa cu esey ta para los na e articulo 2.1.
Solamente e trahadonan gemeld na DOW door di e contratista pa medio di e declaracion di aprobacion ta permiti pa traha na e proyectonan di construccion pa haci mantencion na e edificio. Tur esaki ta conta pa un persona mes ta haci construccion y e mes ta haci un mantencion na un edificio. Un team multi disciplinario cu ta consisti di Cuerpo Policial, DOW, Warda Costa y DIMAS a cuminsa dia 11 mei cu controlnan na proyectonan di construccion y trabounan di mantencion na edificionan existente.
BOETNAN
Ministerio Publico a bin cu un maneho pa contratistanan cu no a meld 1 of mas trahado na DOW. Si ta trata di 1 trahado cu e contratista no a meld na DOW, e lo ricibi un boet di 1500 florin. Pa cada trahado extra cu contratista no a meld na DOW un suma di 500 florin di boet lo bin acerca. Si ta trata di un contratista recidivista, esta un contratista cu a yega di haya boet pa no meld 1 of mas trahado na DOW, lo haya un boet di 2500 florin y pa keda trahado cu e contratista no a meld na DOW lo tin un boet di 700 florin extra.
Pa di 3 biaha constata cu un contratista no meld 1 of mas trahado, lo para e proyecto di construccion of e trabou di mantencion na edificionan existente. Lo bay over na dagvaart e contratista aki, segun Fiscal Pronk. Lo manda e caso di e contratista aki corte, unda hues lo dicidi riba esaki.
Pa loke ta trata e boetnan di no cumpli cu e medida di distancia social y/of fisico, medida di higiena ta keda na vigor. E boet pa esaki ta 1500 florin pa companianan chikito di no mas cu 15 trahado y un boet di 3000 florin pa companianan grandi esta esnan di mas cu 15 trahado. Segun Pronk, e contratista keda sin meld trahadonan na DOW, inclumpimento di medida di distancia social y/of fisico y medida di higiena door di e contratista, tur 3 ta regla den e decreto ministerial. A torah esaki specificamente p’e situacion di crisis cu ta den aworaki.
LEY DI LTU
Loke tambe por pasa ta cu un contratista ta haci uzo di trahadonan cu ta ilegal riba Aruba. Esaki ta algo completamente diferente y den un caso asina e contratista por haya un boet a base di e ley LTU, esta Landsverordening Toelating en Uitzetting. Esaki ta e ley cu ta regla admision y exclusion. Esaki ta un bestuurlijke boet y tin un procedura completamente diferente cu e boetnan duna a base di e decreto ministerial traha specificamente pa situacion di crisis cu Aruba ta den dje actualmente.
