Na prome lugar CBN kier a felicita Aruba henter cu e celebracion di nos dia di Himno y Bandera. Ta pa di 4 biaha cu CBN ta organisa e actividad, Fiesta Arubiano, special pa celebra un di nos dianan nacional mas importante.
Mirando cu ultimo añanan no tabatin actividad den nos dushi districto di Noord, nos como Directiva di CBN a mira como nos tarea pa organisa un actividad pa hunto nos por celebra e dia aki.
Directiva di CBN kier a gradici CedeAruba cu a yuda financia Fiesta Arubiano. Danki na e sosten financiero aki, CBN por crea e plataforma pa artistanan por demostra nan talento y presenta nan canción, poema y baile. Tipiconan por carisia nos oreanan cu nos musica y e caha di orgel y brassband por entre tene e publico.
Esaki ta trece nos na e gradicimento cu sigur ta na su lugar. Directiva kier gradici tur cantante, grupo di baile, declamado di poema, tipico, brassband y caha di orgel pa nan aporte grandi pa haci Fiesta Arubiano 2019 un éxito rotundo. Tambe na tur cu a bin pa bende nan dushi cuminda crioyo, boca dushi y mucha mas.
Por ultimo un danki na nos cuerpo di voluntario campion. Na nos grupo di hobennan cu a percura pa drecha nos bunita stage y tur cu a yuda den bar y pa e organisacion den su totalidad. Un danki di curason. Boso ta campion! Di awor caba CBN ta pidi pueblo en general pa tene e fecha 24 di juni reserva den agenda. Ariba e dia aki CBN tin su siguiente actividad cultural relaciona cu dia di San Juan ‘Dera Gay’. Nos ta conta cu e mesun asistencia masal cu nos tabatin pa cu nos ‘Fiesta Arubiano’.
