Tabata diasabra marduga cu den area di Tanki Leendert tabatin un pelea entre pareha cu a caba na detencion.
Un di e detenidonan aki tabata Orlando David Avila, cu a acerca nos di 24ora.com p’asina duna su band’i medaya di loke a pasa, relaciona cu e problema di pareha cu a termina den detencion, unda cu e tambe tabata un di e detenidonan.
Avila a sigura cu e no tabatin nada di haber cu e pelea. Pero door cu e tabata den bisindario ya cu el a bay busca algo di come, el a ripara un mucha ta lucha c’un homber adulto, cu tabatin un cuchiu den su man y tabata zwaai cu ne.
Ora el a wak esey, su prome reaccion tabata di spanto ya cu e tabata algo no comun. E no tabata kier a bay for di e sitio, pero n’e momento ey el a ripara cu e mucha homber tabata pidi yudansa. Y e homber cu kende e hobencito tabata lucha cu ne, tabata zwaai e cuchiu riba e hobencito y un otro persona mas den e auto. Door di esey el a cuminsa zona e pito di e auto y e baha p’e bay n’e auto unda cu e agresor tabata ta mientras cu e tabata grita pa un hende yama polis.
E momento ey e agresor a acerc’e mientras cu na mes momento e tabata zwaai e cuchiu riba dje. El a purba defende su mes manera cu e tabata por, pa purba evita cu e ta wordo hinca p’e agresor. Asina el a haya un chens, el a yama polis, cu no a tarda pa yega. Polis a baha cu arma na man y a duna e agresor e ordo pa e drumi abou na suela, pero e agresor no tabata cumpli cu ordo policial.
Davila a reitera cu e no tin nada di haber cu e caso aki. e no conoce ni e mucha homber tampoco e señora cu tabatin problema cu e agresor. E ta reitera cu e tabata den bisindario ora cu e situacion a presenta, pero cu e absolutamente no tin nada di haber cu loke a sosode. El a keda deteni pa un dia y mey, sin cu e mes tabatin nada di haber den henter e situacion. Pa esaki tambe el a entrega un denuncia contra di e agresor, ya cu e ta sinti cu e agresor tabata kier a hinca e tambe.
Un preocupacion cu e tin aworaki, ta su trabou. Henter e situacion aki ta sumamente perhudicial pa su persona, cu lo por hay’e sin trabou pa motibo di un situacion, unda cu el a purba yuda un señora cu su yiu sin cu e mes tabatin arte ni parte den tur esaki. Pa el a purba yuda, su integridad y su imagen ta wordo mancha.
