Awe 6 di september Bonerianonan ta celebra nan dia, nan bandera. E bandera di Boneiro ta consisti di color blauw cu ta lama, blanco cu ta shelo y geel cu ta representa solo. Den e parti geel tin un strea di seis punta, cu ta representa originalmente e seis districtonan cu ta Antriol, Nikiboko, Nort Saliña, Playa, Rincon y Tera Cora. E compas preto ta representa e populacion cu ta bin di e cuater skina di mundo.
Boneiro tabata forma parti di Antias Hulandes te ora cu a desolve Antias dia 10 di october 2010 y e isla a bira un municipio di Hulanda. Pero algo cu a hala atencion di hopi hende riba Facebook sea cu bo tin android of IOS, ta cu ora di click e bandera di Boneiro, e ta cambia y bira bandera di Hulanda.
Algun hende a keda sorprendi di e cambio aki y ta puntra nan mes con esaki ta posibel, aunke cu Boneiro ta un municipio di Hulanda, asina mes e tin su propio bandera y himno Tera di Solo y suave biento. Riba e appnan di Whatsapp y Instagram te cu awo no a mira e cambionan aki.
Boneiro
Ta sospecha cu Alonso de Ojeda hunto cu Amerigo Vespucci y Juan de la Cosa a descubri Aruba, Boneiro y Corsou na aña 1499. Awendia Boneiro ta conta cu 20.104 habitante, compartiendo e isla cu ta midi 294 km2$. Desde 2010 a cambia nan florin pa Dollar Mericano como moneda oficial di pago.
24ora.com ta desea tur Boneriano un feliz dia di Boneiro.
