FAVI a yega na inicio di nan accion di donacion pa aña 2018. Pa FAVI esaki ta un di su eventonan mas importante, segun directora Setty Baarh. E evento aki ta yuda na recauda fondonan sumamente necesario pa e fundacion por opera durante henter e aña.
Accion di donacion a cuminsa hopi aña pasa, ora cu FAVI a wordo funda. E accion aki a wordo funda pa boluntarionan cu a mira e necesidad pa e fundacion haya fondo.
E aña aki ta inicia e accion di donacion cu un lema. E lema pa e aña aki ta “Bida no a caba, Bida a cambia.”
Personanan cu tin limitacion di bista, nan bida di berdad ta cambia hopi severo. P’esey FAVI tey pa duna nan e guia necesario, e ayudo necesario pa na momento cu e personanan aki ta experenciando e cambio. Un cambio hopi dificil, pero cu e fondo cu comunidad ta yuda cun’e tur aña, FAVI por brinda e servicio y yuda nan pa bira personanan cu ta sinti nan mes util den e comunidad.
E personanan cu FAVI ta yuda ta baby, e muchanan chikito cu ta bay scol, e hoben y e adultonan. Tur e personanan aki mester di e ayudo. Pesey FAVI ta haci un apelacion na comunidad di Aruba henter, pa sigui yuda FAVI y brinda e sosten financiero pa nan por sigui yuda nan.
E sosten
E suma cu a recauda na 2017 tabata 83.187 florin. Pa FAVI, esaki ta un suma hopi bon. E meta aña pasa pa por a yega 80 mil y a surpas’e un tiki. Ta hopi contento pa esaki, pero sa tambe cu nan tin mester di mas. P’esey e apelacion ta keda na e comunidad di Aruba pa sigui sostene FAVI den esaki. Pasobra cu trabao no ta birando menos. E birando ta birando hopi mas. Tin mas di 300 cliente cu ta registra na FAVI awor aki y tur biaha, tur luna tin personanan cu ta acudi na FAVI pa e ayudo.
Un yamada
Baarh a sigui splica cu e accion di donacion ta consisti di diferente colectante. Tin como 100 colectante cu tin un lista. Riba nan lista nan tin como 20 pa 30 nomber di personanan den comunidad, personanan priva, personanan cu ta traha den diferente companianan. Pero tambe companianan cu ta riba e lista. E colectante e ora ta bay cu su lista y ta bay colecta e suma. E periodo di e accion di donacion ta for di Augustus y e ta conclui na December.
E lema cu FAVI a bin cun’e e aña aki, ta simbolisa e cambio den e bida di un persona cu tin limitacion. Esey ta loke nan tin den forma di un kopi, un regalo bunita, cu na e momento cu bo ta basha un awa friu den esaki, e ta cambia. E ta cambia di color. Ta hopi contento cu nan a logra pa haci e simbolo aki di e cambio. E cambio den e bista di e persona cu un limitacion.
Regalo
Cada persona cu haci un donacion ta ricibi un regalito chikito. E ta un gesto chikito cu FAVI ta haya hopi importante pa duna algo bek tambe. Nan ta ricibi durante di aña for di diferente caminda, comerciantenan tambe cu ta duna y di e forma aki ta gradici pa esaki.
E meta
E fondonan cu lo acumula ta pa cubri full un aña. Naturalmente e fondo no ta cubri tur cos. Pero e ta yuda pa esaki pa e diferente actividadnan. Manera e actividad di awe diahuebs, FAVI-do. Ta un actividad social unda cu e cliente ta bin pa haci obra di man, pa hunga domino, pa pasa un momento agradabel. FAVI ta ofrece nan thee, ta ofrece nan koffie, algun hapje, algo di come y tambe e actividad aki por bay p’afo. Nan ta bay haci diferente actividad. Nan ta bay cana, nan ta bay casino tin biaha, bay lama. Pa tur esaki, mester di fondo. Pero tambe nan busnan ta core, bay busca cliente, hiba nan cas bek, pasobra no ta tur cliente por yega na e actividad y e busnan ta pa yuda nan yega na e actividad, si nan mes no tin e transporte. Tambe e operacion completo di e edificio, awa, luz, coriente, diesel, tur esakinan ta parti caminda cu e fondo ta yuda.
Gasto
FAVI ta ricibi sosten. Gobierno di Aruba semper a duna nan un sosten financiero y esaki ta yuda cubri e salario di e trahadonan. Pa esaki FAVI ta sumamente gradicido y mester di dje. Banda di esey, per 1 di Januari 2017, FAVI a cuminsa ricibi un subsidio general. E forma di subsidio a cambia. Ta un subsidio general y e subsidio aki e ora ey ta cubri un parti chikito di e operacion. P’esey mes FAVI mester sigui busca su mesun fondonan pa e por cubri tur cos. Nan edificio ta sumamente grandi y e gastonan ta mas cu 100 mil florin pa por cubri tur cos sin problema.
Dos y tres aña pasa, situacion financiero no tabata mucho di gaba, cu e sumanan a baha. El a baha te na 70 mil y tabata un periodo hopi dificil pa FAVI. Dos aña pasa nan tabata na 76 mil y aña pasa nan a logra yega 83 mil. Ta spera naturalmente e aña aki cu comunidad di Aruba ta sigui yuda FAVI cu nan aporte. Tin cu bisa comunidad di Aruba, ta sumamente dispuesto pa esaki. Na e momento cu e colectantenan yega cerca nan, nan ta man habri pa haci e donacion aki.
