Farmacure Fungi ta un compania local cu ta cultiva mushroom. Segun Rachel Peterson fundado di e negoshi, a splica cu nan tin riba 25 variedad di mushroom. Den futuro por spera cu nan lo ta treciendo algun producto basta interesante riba mercado cu por yuda cura a traves di cuminda.
Peterson ta cultivando mushroom pa basta aña como hobby. E ta splica cu semper el a crece como un artista. Nunca el a pensa pa hacie den un negoshi. Recientemente e tabata bezig ta tweet un chef y e idea a bin dilanti. El a pens’e pa algun luna y a dicidi pa bay p’e.
KICO PA HACI
Peterson a splica cu mas tanto nan tin mushroom pa come (gourmet). Hopi di nan tin balor medicinal. Por ehempel e Lion’s Mane cual ta conoci y ta proba pa cura alzheimer y e malesa di Parkinson, como tambe pa preveni nan. Esey t’e direccion cu nan kier bay p’e, esta educa pueblo pa nan sa kico e balornan medicinal di mushroom ta. E ta hopi mas cu simplemente cuminda.
E DEMANDA
Actualmente Farmacure Fungi nan tin tres siman di existencia. Nan ta trahando pa hende haya sa cu nan t’ey, ya cu nan no sa cu nan t’ey. Te aworaki nan tin algun cliente manera restaurant High End cu ta sostene nan, unda cu nan ta entrega ‘chef boxes’ tur siman.
MUSHROOM COMO MEDICINA
Algun dia pasa Peterson a conoce un señora cu a bin na nan oficina y a papia di alzheimer. El a sa di hiba Lion’s Mane p’e pashent y eynan a lanta e interes cu mushroom t’ey solamente pa cuminda. Peterson a menciona cu semper kier a bay e direccion ey, pa mustra hende cu door di djis come un cuminda simpel por preveni malesa y hasta cura bo mes.
A traves di cuminda, ta purbando di bin cu suplemento. Pero esey ta algo den futuro. Mester regla tur esey, Peterson a splica. E ta rekeri un tiki mas triki.
E TA SALUDABEL
Hopi hende no custuma come mushroom den cuminda. Peterson a splica cu hopi biaha ta haya e comentario di no gusta mushroom. Na Aruba, tin hende no conoce e diferente tipo di mushroom. Mantene un mente habri, ta loke el a splica. E mushroom mes ta sirbi como substituto di carni, vooral den e cultura vegetariano y vegano. Djis purb’e, e ta super facil pa absorba e sasonnan. Por basicamente kico cu ta cu ne. Peterson mes sa haci un version di ‘pulled pork’ y e saus ta realmente pega riba dje, mescos cu e carni.
CON PA YEGA CERCA NAN
Farmacure Fungi ta situa den Royal Plaza n’e di dos piso. Por haci un cita p’asina por cera conoci cu nan. Den futuro nan lo bay host workshop, ya cu hopi hende ta interesa pa loke nan ta haciendo, vooral p’e hobennan pa nan mira e ciclo di e mushroom y splica nan un tiki mas cu mushroom por beneficia.
DISPONIBEL PA PUBLICO
Pa mas informacion riba Farmacure Fungi, por subi riba nan pagina di Facebook of tambe por tuma contacto cu Rachel Peterson na 7366905. Ta purbando di drenta e supermercadonan local, purbando asina hacie mas accesibel na publico. Tambe tin entrega gratis si ordo por ehempel 2 pa 3 liber.
