Desde 20 di juli te 20 di augustus ta tuma luga e Copa Mundial Femenino 2023 di FIFA na Australia y New Zealand. Esaki ta di nuebe biaha cu ta organisa e campeonato mundial aki y ta prome bes cu tin 32 seleccion nacional participante.
Un di e seleccionnan di nos region cu ta participa pa prome bes den un mundial ta Jamaica y nan a avansa p’e siguiente buelta. Un otro seleccion cu a sorprende tur hende ta Colombia, cu a gana dos wega. Nan a gana Sur Korea y Alemania, y esey a pone cu nan ta prome den nan grupo. Pero nan tin un wega mas pa hunga, unda cu nan ta buscando un di e ultimo dos luga pa forma parti di e diesseis seleccionnan cu ta hunga den e octavo final.
Raul Martínez ta di vakantie na Aruba y ta di Colombia. E ta sumamente orguyoso di e seleccion femenino di su pais natal cu ta competiendo den Copa Mundial Femenino 2023. El a indica di ta orguyoso di e grupo femenino aki cu a hisa na halto e shirt di Colombia. Nan ta satisfecho cu e trabou realisa cu e hungadonan aki a haci te cu awo. E seleccion aki a haci tur cos p’e shirt, p’e pais Colombia.
No sa di mundial
Mundial femenino of futbol femenino no ta mes popular cu esun di masculino. Y por a nota cu hopi hende no sa cu ta tumando luga e mundial di femenino. E mundial aki tambe ta organisa cada cuater aña.
Gustavo Rodas, fanatico di futbol, a expresa cu e ta kere Colombia ta bay cu e titulo. E ta sigui e wega femenino via television y media social. E ta kere cu mester uza mas media social pa propaganda y inverti mas. Normalmente futbol ta di hende homber, pero awo e ta birando mas grandi p’e hendenan muhe. Pero si inverti mas den esun di hende muhe, nan ta bay crece.
