Diahuebs anochi Archie Rasmijn hunto cu su famia a pasa den un di e momentonan di mas dificil cu un persona por pasa specialmente durante e dianan di fiesta aki, unda a perde nan cas completamente. Aki ta referi n’e cas na Santa Cruz cu a pega na candela rond 10’or di anochi y mobilisa diferente departamento concerni pa combati esaki.
Ayeranochi, pa ta exacto rond e caminda di Botica Maria bin Abao, nos a mobilisa n’e sitio y mira vlam grandi ta bay laira. E candela tabata uno hopi grandi cu a spanta henter e bario. Nos a logra combersa cu Archie Rasmijn, doño di e cas, un persona di edad relativamente grandi, kende a conta nos cu su señora ta actualmente na hospital.
![](https://24ora.com/wp-content/uploads/2023/12/CK9A4987-1920x1280.jpg)
Debi cu el a haya algun kemadura riba su curpa, y Archie mes tambe a keda herida. Archie ta conta cu e candela a cuminsa riba e parti di coriente y bay over te paden di e cas, cu consecuencia fatal unda e matanan den cercania a pega candela.
Pa ora por a purba paga esaki tabata mucho laat. Un mucha homber cu tabata cerca y kende nos lo tin un entrevista exclusivo cu ne pronto, a bay over na purba yuda e hendenan den e cas. El a saca e pareha di Archie for di e cas, un señora di edad hopi grandi cu tabata riba cama drumi. El a core saca e señora for di parti pafo pa asina evita cu e desgracia aki por a bira uno pio.
Dos unidad di bombero a presenta cu maximo urgencia, y tambe dos unidad di ambulans, polis di Santa Cruz y demas autoridad cu a cera parti di rotonde pa evita trafico pasa dilanti di e cas.
![](https://24ora.com/wp-content/uploads/2023/12/CK9A4985-1920x1280.jpg)
![](https://24ora.com/wp-content/uploads/2023/12/CK9A4988-1920x1280.jpg)
E famia awor lo habri un aña nobo sin nan cas. E famia aki tin artesania colecta cu ta data mas o menos 10 pa 20 aña of mas, y tur esakinan a bay perdi den e candela. Nos lo keda monitor e situacion aki di cerca y entrevista Archie p’e conta kico tur el a pasa aden.
Riba nos pagina di Facebook nos a publica un Anuncio Publico caminda famia di e pareha cu tabata den e incendio aki diahuebs anochi ta buscando ayudo, mirando cu nan a perde tur nan pertenencia den e candela feroz aki. Nan ta un pareha grandi cu ta sufri di un cu otro kebrante di salud riba dje.
![](https://24ora.com/wp-content/uploads/2023/12/CK9A4981-1920x1280.jpg)
Ta pidi comunidad pa pone man na curason. Ta aprecia masha si por ricibi ayudo, pa asina nan por haya sea paña y/of yudansa cu cuminda. Por tuma contacto cu Yudella Chirino riba 747-9999, tambe ta pone number di cuenta unda por haci transferencia: Enalia Chirino | Banco di Caribe | 80200004