Alrededor di 400 studiante a asisti n’e Expo Trabou cu WeConnect a organisa dia 19 di october ultimo, den cooperacion cu e decano di Colegio Arubano.
E alumnonan di HAVO 4 y 5, como tambe VWO 4, 5 y 6 a haya informacion di kico cierto profesion ta encera. Meta di esaki ta pa apoya e studiantenan di (voor) examen den nan escogencia di estudio y careranan despues. Mas di trinta profesional a conta den practica e contenido di nan profesion.
![](https://24ora.com/wp-content/uploads/2023/10/Twee-professionals-voor-de-klas-1920x1280.jpg)
INFORMACION
E fundacion educativo WeConnect ta comprometi na un (miho) preparacion di estudio, cuminsando na scol. “Nos a ripara cu ta bastante dificil pa e studiantenan Arubiano tuma un decision bon orienta pa studia na Hulanda. Un profesional entusiasma cu su trabou, papiando di su profesion por informa y inspira un persona,” segun Tanja Fraai, director di WeConnect. E mercado di eleccion profesional ta forma parti di un serie mas amplio di sesionnan informativo di WeConnect, na Colegio Arubano y otro scolnan.”
PROFESIONAL DILANTI KLAS
P’e Expo di Profesion, e profesionalnan den diferente ofishi a coopera pa duna mas informacion. Entre otro, un dokter di cas ANIOS, un accountant, un empresario, un Salesmanager, un piloto, un diseñador multimedia y un dentista a papia tocante nan trabou. Di e manera aki, e alumnonan por tin un idea di varios di e profesionnan.
Mia, di VWO5, a mustra entusiasmo. “E dia tabata uno hopi interesante! Mi a atende un panel tocante ley unda cu a haya informacion di mr. Chamila Tromp. E informacion tabata duidelijk e presentacion tabata bon hinca den otro.”
![](https://24ora.com/wp-content/uploads/2023/10/Professional-voor-de-klas-1920x1280.jpg)
INSPRACION
E profesionalnan tambe tabata entusiasma. Marketing Specialst Eslaine Croes ta wak bek riba un anochi exitoso. “Tabata bunita pa por inspira un generacion nobo y laga nan wak kico ta bunita di marketing, ya cu marketing ta un pasion y bo mester por gust’e, di otro manera e no ta bay.”
Howard Hart, traharndo como Business Consultant: “Mi a gusta cu mi tabata por a dune e studiantenan un perspectiva ‘fresco’ y mas realistico di kico ta entrepeneur. Pa ta un entrepeneur ta algo hopi amplio. Nan tabatin interes di kico e ta encera y con nan tambe por yega eynan.”
![](https://24ora.com/wp-content/uploads/2023/10/Organisatie-docenten-en-decanen-Colegio-en-professionals-1920x1280.jpg)
NECESIDAD
Tin un necesidad na Colegio pa e obtene informacion di WeConnect. Richeilla Wijngaarde: “Door di a organisa e anochi di profesion aki nos kier duna e alumno un plataforma unda cu nan por bin den contacto directo cu e profesional- y expertonan riba diferente ambito.
Esaki ta duna nan e oportunidad di haci pregunta, satisface nan curiosidad y pa un miho comprendemento di kico e diferente profesionnan ta encera. Ademas e ta yuda nan den dicidi cual ta e stapnan cu nan por tuma pa yega na nan meta profesional. “
Ta spera cu na 2024 e Expo Trabou lo tin un bunita continuacion.
Potret ta cortesia di WeConnect.