E tema di BBO na frontera ta uno sumamente al caso y debati actualmente entre Departamento di Impuesto, nos gobernante y comerciantenan. No ta un secreto cu Aruba Trade & Industry Association (ATIA) mes ta hopi critico riba e posibel introduccion di e ley nobo aki.
Pa exactamente e rason aki, ATIA a acerca Director di Departamento di Impuesto (DIMP) Luenne Gomez-Pieters pa haci un session al estilo di un “Town Hall” pa su miembresia, Herrick Henriquez, Director di ATIA a splica.
Director di DIMP a gusta e idea pasobra e ta un manera diferente y innovativo pa comunica directamente cu e comerciantenan. P’e rason aki Gomez-Pieters mes a tuma e iniciativa pa invita Director di Aduana, Roderick Croes pa tambe asisti n’e town hall, pasobra e BBO na frontera lo mester bay simultaneo cu cambio di ley di Impuesto.
Tema trata den e session
BBO na frontera
Directora di DIMP den su presentacion a duna un demostracion di e sistema nobo di Bo Impuesto (BOi), pa mustra e cambio y tambe e conexion cu sistema di Aduana. Ademas mester indica cu hopi diferente tema y situacion trata durante e session. Algun tema di suma importancia tabata siguramente e tema di “handelsgoederen” y kico si y no ta considera como un handelsgoed. Tambe e tema di unidad fiscal (“fiscale eenheid”) y con esey lo traha awo cu un BBO na frontera. Mester indica cu ta importante si un comerciante tin un unidad fiscal p’e revisa y actualisa esaki na DIMP, pa no haya problema den futuro.
Otro tema tabata esun di e asina yama “teruggaafbeschikking” ora cu DIMP mester debolbe placa na un comerciante. Aki atrobe ta importante pa tur informacion di cuenta di banco di e comerciante ta actualisa, pa no tin problema ora mester debolbe placa.
Impuesto di importacion
Pa cu impuesto di importacion, a toca e tema di simplificacion di e nivelnan di impuesto, unda cu Director di Aduana a duna ehempel amplio di cambio. Tambe a sigui tocante e servicio di Aduana, freezone, entrepot pa auto y producto “green” cu ta un tema hopi debati awo riba red social. Mester bisa cu ambos director a contesta tur pregunta y a aclaria hopi incertidumbre di e miembresia, pero tambe a tuma bon nota di tip cu e miembresia a duna cu lo por yuda den futuro.
Satisfecho y agradecido
ATIA ta sumamente satisfecho cu un sala completamente yen y agradecido na Directora di DIMP y Director di Aduana y nan team pa por a colabora na nos town hall. Si como comerciante bo no a haya espacio pa atende ATIA su town hall, nos ta recomenda pa busca mas informacion posibel of sigui nos riba nos rednan social unda nos ta comparti informacion regularmente.
Ocasionalmente ATIA por ta critico specialmente riba e dos Departamento nan cu a asisti n’e town hall, pero ta importante pa comunidad y comercio sa cu nos tin bon comunicacion cu gerencia di ambos Departamento cu ta uno basa riba respet mutuo.
ATIA lo keda boga pa reforma cu lo yuda pa sigui crece y fortifica economia di Aruba, pero tambe continua cu organisacion di sesion informativo y e eventonan social pa engrandece nos miembresia.
ATIA
A funda Aruba Trade and Industry Association (ATIA) na aña 1945 y t’e organisacion principal cu ta representa empresa, empresario y comercio na Aruba. E meta di ATIA ta pa defende, promove y proteha e interesnan di su miembronan y comercio di Aruba en general. Pa mas informacion por bishita www.atiaruba.org y red social www.facebook.com/arubatrade, www.instagram.com/atiaruba, y https://www.linkedin.com/company/aruba-trade-and-industry-association.
