Diabierna Corte den Prome Instancia a trata e caso penal contra e sospechosonan G.G.G.O., M.G.J.M. y J.R.R. den e asina yama caso Anglo. Ta acusa e ex-contratistanan aki di departamento di salubridad (DVG) di a haci registro falso durante e campaña di vacuna y di a haya pago pa haci esaki.
E sospechosonan aki a desacredita Pais Aruba cu nan actonan. Den un temporada di medida y restriccion nan a haci maluso di nan posicion puramente pa ganashi financiero.
E confianza cu por tin den e campaña di vacuna y e status cu un prueba di vacuna Arubiano por tin, a bay na discusion, pa nan manera di actua. Den un pais manera Aruba cu ta depende di turismo, esey ta algo sumamente dañino, na opinion di Ministerio Publico.
VACUNA REGISTRA
Investigacion a mustra cu a registra sigur 60 vacuna na orarionan cu e post di vacuna tabata cera ainda. Tambe a haci un cantidad di registro for di cas di un di e sospechosonan. A scucha diferente persona cu ta aparece riba e lista di registronan como sospechoso y nan a declara cu nan a paga pa un prueba di vacuna. E sospechosonan mes ta bisa cu ta trata di 5 pa 11 registro.
Ministero Publico ta acusa e sospechosonan di a participa na un organizacion criminal cu a comete echo castigabel, esta registra prueba falso di vacuna. Ademas nan ta acusa di corupcion como ambtenaar. Alabes un di e sospechosonan ta acusa di posesion di cocaina.
P’e rasonnan aki fiscal a exigi durante e tratamentonan di e castigonan di prison contra e sospechosonan O. y M. di respectivamente 18 luna, di cual 12 di condicional. Contra e sospechoso R. fiscal a exigi un castigo di prison di 22 luna, di cual 18 ta condicional. Fiscal a exigi contra tur tres sospechoso castigo di trabao pa comunidad di 240 ora y un multa di 2.500 florin.
Tambe a pidi Corte pa lanta e suspension di nan detencion preventivo, p’asina e sospechosonan lo por ta traslada mes ora pa KIA pa sinta nan castigo di prison, si en caso hues haya nan culpabel.
Huez lo dicta sentencia riba 8 di juli venidero.
