Un delegacion di oposicion a biaha e siman aki pa Hulanda unda a participa den diferente reunion den area politico y gubernamental.
Un di e reunionnan aki tabata cu profesor Paul Schnabel, kende ta un sociologo admira y renombra na Hulanda. El a fungi como director di Sociaal Cultureel plan bureau desde 1998 te cu 2013. Paul Schnabel ta docente universitario na Universidad di Utrecht. Desde 2015 te cu 2019 Paul Schnabel tabata miembro di Eerste Kamer na Hulanda pa D66.
Paul a enfoca ariba e tereno di asunto social, bienestar general, cuido medico, economia, enseñansa y labor. Alabes Paul Schnabel tabata miembro di e Wetenschappelijke Raad voor het Regeringsbeleid (WRR)
A hiba un dialogo profundo cu Paul Schnabel ariba su experencia Paul como director di SCP na Hulanda. Pero tambe a delibera ariba e structuranan necesario pa garantisa funcionamento optimal di un instituto manera SCP pa Aruba. A discuti e importancia di ehecuta esaki den colaboracion cu Hulanda.
Paul Schnabel a reconoce e necesidad di un instituto manera Sociaal Economische culturele plan bureau pa Aruba. Paul Schnabel a remarca cu: “e informacion di un instituto independiente y cu autoridad manera SCP ta necesario pa gobierno por formula maneho cu ta racional”
E delegacion di oposicion, partido berde, a enfatisa cu e proposicion no ta solamente importante pa asuntonan interno, pero tambe pa e relacionnan den Reino Hulandes p’asina nan por tin den bista di e realidad socio-economico di nos Pais. Lider di fraccion berde a splica cu e proposicion ta cuadra den e vision amplio pa realisa e bon comun pa comunidad di Aruba.
