Grupo di Teatro CCCA (Cultiva, Creatividad, Arte y Cultura na Aruba) bou direccion di Ferdinand Franca hunto cu Maria College Mavo, ta presenta 8 y 9 di april 2022 e musical: Planta awe, cosecha mañan den Cas di Cultura. E Musical aki ta dedica na Vicente Ras cu ta nos baluarte den mundo di musica.
Ferdinand Franca actualmente ta docente di CKV na Maria College Mavo y a cuminsa cu e Musical na aña 2019. Maria College Mavo tabata tin un after school program pa prepara hobennan den e area expresivo. A tuma e tema di e aña 2019 cu tabata “Turista riba mi isla”, como inspiracion pa skirbi un Musical cu tema di Aruba.
A scoge pa skirbi un Musical nobo en bes di uza un musical existente pa produci obranan local y original. Debi na e pandemia no a logra termina e Musical aki, pero e aña aki en conexion cu e celebracion di 80 aña di Maria College Mavo, a dicidi pa finalisa e Musical aki y celebra arte na grandi.
E Musical ta conta cu un elenco di mas of menos 50 hoben cu ta consisti di alumno y ex-alumno di Maria College Mavo. Tambe a invita scol di baile Club di Movimiento, bou direccion di Samantha Westera Juppa.
Lo tin dos acto den e Musical. Acto un ta refleha e pasado di Aruba cu tema nan manera e seno familiar, plantacion y tambe e desaroyo economico. Acto dos lo refleha e futuro di Aruba cu temanan actual y e cambionan cu por tuma luga. Ta bay tin varios genero di musica, tecnica di teatro innovativo, bailenan moderno, y un decoracion y arte visual diferente. E ta un obra humoristico, cu tur persona por siña hopi di dje. Nos ta recomenda e muchanan bin acompaña pa un adulto y nos ta invita tur hoben y adulto pa bin presencia e Musical aki. E carchi ta solamente 25 florin y ta obtenibel na Cas di Cultura, Plaza Book Shop, Gallo Rojo y Maria College Mavo.
Tambe nos kier gradici e sponsornan cu a yuda haci e Musical bira un realidad. Nos kier gradici Unoca, Departamento di Cultura, Aruba Bank, BK Consult y Mixed Media, pa nan tremendo aporte pa nos realisa e Musical aki. Tambe nos kier gradici Maria College Mavo, e mayor- y alumnonan cu ta participa.
Grupo di Teatro CCCA tin como meta pa prepara hobennan den e Arte Escenico, pa nan por salvaguardia e existencia di Arte y Cultura na Aruba. Tambe pa investiga, documenta y publica loke ta Arte y Cultura di Aruba. Nos ta invita tur ex-alumno di Maria College Mavo, hoben y adulto pa bin presencia e Musical y apoya nos talento y produccion local. Nan lo bira nos futuro cantante-, actor- y directornan den futuro.
Maria College Mavo ta un scol unda trabou den ekipo ta hopi importante. Nos lema “I Am Because We Are” ta representa e habilidad di traha hunto. Trahando hunto nos ta yega leu den bida. Nos ta orguyoso di nos team, alumno, ex-alumno, y e mayornan cu a bini hunto bou guia di Ferdinand Franca, pa asina yuda saca e potencial maximo di nos hobennan. Cu e simia cu nos planta awe den nos hobennan, nos lo cosecha ciudadanonan ehemplar cu lo yuda hiba Aruba padilanti.
Amor y respet pa otro ta haci e trabou di ekipo exitoso y ta laga nos ta un mihor ser humano.
Nos a scoge ARTE pa celebra nos 80 aña di aniversario pasobra arte ta fundamental pa e desaroyo di un ser humano, unda nan ta adkiri e habilidadnan necesario pa siglo 21, manera e arte di presenta, traha hunto, liderazgo etc. y asina nan ta prepara pa e trabounan cu no ta existi ainda.
