Secretario di Estado, Alexandra van Huffelen, a indica cu nan kier refinancia Aruba. Pero e condicion ta ley di Raft. Prome minister di Aruba a indica cu parlamento no ta di acuerdo y nan ta den combersacion cu Hulanda pa yega na algo otro. Aruba no tin e 916 miyon florin pa paga debe cu Hulanda.
Prome Minister mr. Evelyn Wever-Croes a indica cu a informa na varios ocasion nan a informa Hulanda cu Parlamento di Aruba ta contra e ley di Raft. E mandatario ta haya cu su opinion personal no ta conta mas, pasobra parlamento ta riba nan.
Mayoria den parlamento a bisa cu nan ta contra e Raft, pero un par so a bisa di ta na fabor di Raft tabata e fraccionnan MAS y Accion21. E otronan a expresa di ta contra y a pon’e riba papel. Esey ta significa cu tin tres di e 21 ta na fabor, e ora e no ta pasa.
Segun e mandatario, nan ta bezig cu Hulanda pa mira con otro si por yega na palabracion cu parlamento por biba cu ne, cu gobierno por biba cu ne y Hulanda tambe. Den e ultimo corespondencia, segun e mandatario, Hulanda a indica cu e no mester ta Raft, pero con tal cu e ta un Rijkswet.
Awo nan ta weitando si den e cambio di posicion di Hulanda tin espacio pa acomoda e preocupacionnan di parlamento. Te ultimo biaha parlamento ta contra Rijkswet y Raft. Parlamento a pidi pa gobierno contesta e preguntanan cu nan a haci aña pasa na mei, y awo ta den esey nan ta.
A puntra van Huffelen riba e echo cu si Aruba no acepta e ley di Raft y si tin un otro alternativa, e contesta tabata un “no.” E mandatario a enfatisa cu pa su persona ta dificil p’e por duna un reacciona na algo cu e no tabata presente. Pero e tin un carta di van Huffelen cu ta bisa di un Rijkswet. Riba esey ta loke gobierno ta trahando.
E mandatario a indica cu van Huffelen tabata na Aruba siman pasa y a toca e mesun tema.
No tin placa pa paga debe
Na october Aruba mester cuminsa paga e debe. Segun Wever-Croes, nan ta negociando e refinanciamento, pasobra Aruba no tin pa paga e 916 miyon florin den luna di october. Hulanda a informa gobierno cu nan ta dispuesto pa refinancia e debe, cual ta algo cu nan a regla caba.
