Pueblo di Aruba kier hala rosea y kier biba atrobe. Nos pueblo kier soña pero nos tin un gobierno cu ta matando e soño di nos pueblo. Un gobierno cu 5 aña na poder tin como unico plan di gobernacion medida y mas medida. Un gobierno cu no tin simpatia mas di pueblo y unda cu bo bira bo ta tende “ki dia e gobierno” aki ta bay cas pa no bolbe nunca mas. Un gobierno cu a hasi nos un isla inutil y sin futuro. E cosnan aki ta pasa ora cu nos tin un gobierno cu ta adora baal y cu ta bay contra leynan di Dios.
Nos gobernantenan ta spanta, paso nan sa cu nos pueblo ta rabia. Na ki manera nos ta haya sa cu nan ta spanta. Facil tur medida cu nan bini cu ne nan ta hala atras ora nan tende pueblo laga su bos resona. Nan ta busca moda pa traha riba emocion di nos pueblo, pero nan a ripara caba cu nan no ta haya oido. Tur decision cu nan tuma ora di sinti e rosea di pueblo nan ta core cambia. Esaki ta e señal cu nan ta spanta. Nan ta riba un schaakmat pasobra nan sa masha bon cu e decreto real ta ariba mesa y cu nan lo no scapa di dje. Un decreto real cu lo duna tur e 8 ministronan aki un certificado di incapacidad. Otro gobierno cu ta pone Aruba su cara na berguensa, manera a pasa cu e gobierno di AVP den pasado. Esun cu ta comete fraude lo no biba den mi cas; esun cu ta papia mentira lo no keda para den MI presencia.
Un gobierno unda cu a mishi el a haci mas daño cu bon. Nos pueblo ta warda riba un respuesta, riba un cambio, riba un aliento pero tur cos ta mustra cu ta manera un mal soño cu no tin fin. E unico cos cu e gobierno aki ta trece ta mas stress y mas problema pa nos pueblo di Aruba. Nos ta yegando un caminda cu tur cos ta mustra scur y cu no tin solucion. Nos di partido Curpa kier bisa pueblo cu si tin solucion y cu si tin speransa. E ultimo cos cu nos pueblo di Aruba mester haci ta perde speransa. Nos di partido Curpa ta comparti cu e gobierno aki den 5 aña di tempo no a bin cu ningun proyecto y nan no a demostra di ta parti di solucion. Nan a demostra 5 aña di mal gobernacion y un gobierno di desastre.
Nos di partido Curpa ta busca e solucion pa nos problemanan na prome luga door di haci oracion na nos bon Dios, E ta scucha nos oracion. Nos sa cu cambio ta na caminda pero nos mester wanta duro y laga e tormenta perfecto cu nos gobierno a hinca nos aden pasa. Despues di e tormenta aki solo lo sali y lo briya pa nos pueblo. Wanta un tiki mas pueblo.
E proximo gobierno cu bin, lo bay tin un reto hopi grandi su dilanti. Nos pais a keda pega den tempo y esaki ta danki na un gobierno sin maneho y sin vision. Pueblo di Aruba nos tin un Dios cu ta duna nos speransa. Un Dios cu lo bin na nos ayudo. E pueblo cu conoce nan Dios lo ta fuerte y lo tuma accion. Esaki ta e tempo pa nos hisa nos cara na laira y bisa Dios danki pa e cambio. Laga nos habri nos curason y laga nos ricibi e gozo di nos Dios. E gozo di Dios ta nos fortalesa y lo duna nos pueblo e forsa pa lucha te na final. Nos pueblo lo no cay na caminda y nos pueblo lo no biba na rudia. Nos pueblo lo mira su victoria.
Lider di partido Curpa
Eric Ras
