Aruba Marriott Resort &Stellaris Casino, AHATA, ASD Hotel & Restaurant Equipment & Supplies y Colegio EPI, kier a desea graduado di Colegio EPI Ivan Puriel hopi exito cu su pasantia den exterior na un restaurant prestigioso di dos Michelin Stars di Chef François Geurds, na Rotterdam, Hulanda.
Diahuebs, 11 di januari graduado Ivan Puriel a subi avion pa haci un di su soñonan realidad. E mes a expresa cu oportunidadnan asina ki ta bini danki na dedicacion, door di kere den bo mes y tambe na companianan cu kier hiba Aruba padilanti.
Nos ta sumamente orguyoso di Ivan y ta wak cu e ta bay logra cosnan grandi den futuro. Mas cu claro ta gradici Aruba Marriott Resort & Stellaris Casino y su Complex General Manager, Raoul Lemmerling, pa a financia e acomodacion di Ivan.
Tambe kier a gradici AHATA y su Presidente, TisaLaSorte pa financia e vuelo y otro gastonan. Y sin laga afo, ta gradici ASD Hotel & Restaurant Equipment & Supplies pa financia e uniform di e chef pa Ivan. Di parti di Colegio EPI ta contento di e werkgroep International Affairs cu a aporta na yuda coordina e proyecto aki.
Esaki ta sigur un bon comienso pa e area culinario por sigui crece y tambe bira mas atractivo cu oportunidad pa tur den e sector aki. Aruba por keda pendiente di mas proyecto grandi asina’ki cu ta na caminda.
