Facultad di Turismo di Universidad di Aruba ta organisa un encuesta nacional pa mamanan, cual lo cuminsa e siman cu ta bin.
Ta trata di un encuesta cu a yega di haci na 2002 y 2010 caba, pero debi cu e datonan no ta actual mas, a dicidi di organisa uno nobo den 2021.
Thais Nierop di Facultad di Turismo a enfatisa cu no por traha cu e datanan bieu mas, mirando cuanto aña a pasa y tin un otro generacion di mamanan pa cual mester di informacion mas actualisa. Banda di esey, tin personanan di diferente cultura y poblacion a bira mas grandi.
Studiantenan di Universidad di Aruba ta bay haci e encuesta aki hunto cu Fundacion Pro Lechi di Mama, Casnan di Partera y Wit Gele Kruis. Ta traha cu e organisacionnan aki pa motibo cu nan tur ta traha cu mamanan y cada un por analisa e datonan of a yuda formula e preguntanan basa riba e trabou cu nan ta haci. Inclusive pa analisa e cultura y habitonan cu ta tuma luga. E parti aki ta cay importante pa Fundacion Pro Lechi di Mama. Pa Wit Gele Kruis ta importante haya sa for di e mamanan si nan ta sinti cu falta informacion di unda pa acudi pa ayudo cu nan baby.
“E encuesta nacional ta den bienestar di mamanan. El a wordo haci na 2002 y 2010, pero cu e datanan ta un poco bieu. Den pasado a wak solamente riba e kico di e alimentacion pero no a mira e di con. Pa e motibo a agrega un serie di pregunta nobo,” Nierop a splica.
Elizabeth Encarnacion, un di e studiantenan di UA cu ta tras di e encuesta aki, a splica cu e lista di pregunta ta largo pero ta apela na e mamanan pa tuma un tiki tempo pa yuda haci e encuesta bira un exito. E maximo di tempo cu e lo tuma na tempo a 15 minuut pa logra traha cu datonan mas actualisa, enbes di esunnan di mas cu un decada pasa.
E encuesta aki cu ta pa mama di muchanan di 0 pa 4 aña, ta riba tur rednan social. Via e mesun sistema aki ta bay contact diferente mama.
