Un criatura di nuebe aña a landa bin aden despues di a cay for di un boto na altura di Riu Antillas. A bati alarma mesora na autoridad y un buskeda a inicia den ful e area.
Esaki a tuma luga un rato pasa (1:00 pm) ora cu autoridad ta informa cu un criatura, abordo di un boto priva numera A-1854, lo a cay for di dje y cu e mayornan lo a bati alarma. Por a tuma nota cu helicopter, boto di maritiem di polis como boto di wardacosta a dirigi nan mes cu maximo urgencia direccion Palm Beach.
Dilanti e beach na Riu Antillas a cuminsa un buskeda extenso den e area y como cu no tabatin informacion concreto, e buskeda tabata amplio pero confuso. Na e area di beach dilanti Riu Antillas a encontra cu un pareha turista cu a confirma cu en berdad nan a tuma nota di un criatura di nuebe aña, cu a bin aden riba su mes for di den awa y tabata mustra spanta. Mesora a bay atende cu ne y a bin constata cu e criatura lo a cay for di boto y a landa bin aden.
Nan a duna polis, cu a presenta na e area di beach, tur informacion den nan declaracion y asina aki a dirigi nan mes na Marriott Hotel. Segun e turista a duna di conoce, nan lo a compaña e criatura na pia, te na e hotel cu e ta hospeda.
Autoridad di su banda a presenta na e area di beach na Marriott caminda cu a bin topa cu e capitan di e boto como tambe mayornan di e criatura. Di nan banda tambe a haya un version di locual a tuma luga y a bandona sitio mesora. Di parti 24ora tambe a purba di haya un declaracion di ambos pero esaki no a logra. No ta conoci kico por a tuma luga abordo pero e trankilidad pa tur partido ta cu e criatura a sali ileso di ful e sucedido aki.
