Edward Maduro: Ultimo biaha cu tabatin perdida di poder di compra tabata na 2013

Durante un conferencia di prensa di sindicatonan cu ta representa empleadonan publico, a papia di indexering, tema cu nan ta atendiendo aworaki cu Gobierno. Cifranan oficial di 2018 ta mustra cu empleadonan a bay atras den nan poder di compra pa cual e sindicatonan ta pidi 3.6% di indexering.

Edward Maduro, bosero di e sindicatonan, a splica den e conferencia di prensa na sede di SIMAR cu e ultimo biaha cu a otorga indexering tabata na aña 2013. Despues di esey a yega na acuerdonan bilateral firma na 2014 den cual ta para algun regla pa loke ta trata indexering, cual a wordo firma door di mayoria sindicato. E tempo ey a premira cu pa sigur 3 aña no tabata bay tin e discusionnan ey pasobra a premira cu no ta bay tin inflacion. Pero na 2018 a cera aña cu un cifra di inflacion di 3.6%.

 

Den 2019 sindicatonan a dicidi di bini hunto y pidi Gobierno sinta na mesa pa cuminsa cu negociacionnan pa cu indexering. E sindicatonan den un reunion cu Gobierno dia 8 di april, a duna nan punto di bista riba e tema aki. Despues a sinta cinco biaha mas, mustrando cada biaha e punto di bista di sindicatonan, pidiendo 3.6% como punto salida y cu pa 30 di juni mester finalisa cu e discusionnan. Pero Gobierno den cada reunion a duna e mesun splicacion, cu mester di tempo y no a tene cuenta cu indexering ora di a traha presupuesto. Pa esaki mester di tempo y espacio pa Gobierno yega na un proposicion. A pidi un contra-proposicion pa sinta na mesa y negocia, pero no a ricibi esaki.

E ultimo carta cu e sindicatonan a ricibi di Gobierno tin algun punto cu a hala nan atencion. Na prome luga, cu el a wordo firma door di casi tur Minister. Y cu Gobierno ta pidi tempo y espacio pa traha riba un proposicion. Un carta hopi vago, pasobra no ta menciona cuanto tempo nan mester.

Maduro den e conferencia a enfatisa cu no ta awo a bini cu e discusionnan, pero pa algun luna caba ta discuti esaki. Y a bini cu e tema pasobra tin e cifranan oficial di loke inflacion tabata den 2018 y cu esaki por bati na porta di Gobierno pa pidi e compensacion pa perdida di poder di compra. Y e perdida di poder di compra a sosode te awor, despues di 5 aña.

E sindicatonan a puntra Gobierno tambe den un di e reunionnan cu no a tene cuenta cu indexering ora cu a negocia cu Hulanda e plafond di gastonan di personal. “Gobierno a admiti cu nan a “overlooked” e parti aki ora cu nan a cera acuerdonan cu Hulanda. Si Gobierno a tene cuenta cu na 2018 tabatin inflacion, awo nos lo no tin mucho discusion pa loke ta gasto di personal.”

Na mesun momento sindicatonan ta adverti Gobierno pa tene cuenta cu e aña’ki e inflacion ta mas halto cu 2018. Ya caba ta papia di un averahe di 4.4%, awor cu ta memey di aña.

PENSIONADONAN

Un otro tema cu Edward Maduro, bosero di sindicatonan di empleadonan publico, a trece dilanti durante un conferencia di prensa diamars mainta, ta un reclamo di pensionadonan. Ta e asunto di BashiePremie y Gelijkbedrag, cu esnan cu a baha cu pensioen desde prome di januari, 2015, no ta ricibi esaki.

Maduro a splica cu e decision pa kita esaki di pensionadonan, a wordo tuma den forma unilateral door di Gobierno. Sindicatonan nunca a firma esaki. E ta hinca tambe den e consulta di pensioen 2014, unda a papia di Duurtetoeslag. Sindicatonan no a firma pa kita esaki, pero a wordo kita di forma unilateral na 2016 door di Gobierno. Pero e tin atencion di e sindicatonan.