Diaranson a tuma luga e di dos dia di encuentro di Eagle LNG cu comunidad, unda e compania a duna informacion di e proyecto. Un di e puntonan tabata e tubo di gas, pero di otro banda esunnan cu a presenta mustra nan preocupacion.
“Mi ta un tiki preocupa cu nan no a bini cu un hende cu lo bay studia e riesgonan, pa splica nos kico ta e sorto di riesgo cu ta bay hinca den su estudio pa bini cu medida”, asina Leopoldo Henriquez, ciudadano preocupa, a expresa. Asina aki pa evita cu desasternan lo pasa.
Parlamentario di MEP, Alvin Molina tambe tabata presente n’e encuentro aki. El a informa cu loke su persona a compronde ta cu e tubonan ta bay bou tera. Esey ta algo hopi mas safe y tin mesun peliger pa un auto por dal den dje y causa un leak.
Tambe el a compronde cu e tecnologia ta asina avansa, a test e caba tur caminda rond mundo y e chens ta algo hopi minimal cu algo lo por bay fout cu e tuberia.
Segun Alejandro Bastardo, representante di Eagle LNG, nan no a conoce ningun preocupacion relevante. Tabata simplemente curiosidad di conoce mas e proyecto.
Desiree Paalman, ciudadano preocupa, a indica cu nan conoce e pida bon bon unda Eagle LNG kier bay traha. E pier a cay caba, pero si ta bay amplia mas, eynan tin hopi bida marino. “Nos ta preocupa p’e pida eybou cu nan no ta bay daña nos coralnan, ya cu nan ta hopi daña caba”, el a expresa. Tambe nan tabata preocupa si e tubonan lo tabata pasa riba tera, ya cu nan ta biba cu tubo riba tera y awo mas tubo. Durante e encuentro a bisa cu e tubonan lo bay bou tera, pero awo nan kier wak e bida marino, con nan ta bay traha n’e seccion cu nan ta bay haci awo.
Pa mas lesa TREMPAN.COM.
