Despues di a reanuda negociacion cu sindicatonan cu ta representa empleadonan publico dialuna den oranan di atardi a informa cu Gobierno y e shete sindicatonan a yega na un acuerdo riba e tema di Indexering. No loke cu e sindicatonan a pidi na inicio cu tabata 14.5%.
Gobierno a haci e anuncio aki den presencia di representante di e diferente sindicatonan. E acuerdo ta na beneficio di empleadonan publico. Prome Minister Wever Croes a splica cu a yega na e acuerdo aki despues di a traha pa crea e espacio financiero, pasobra mester a mantene nan mes na e norma di loke ta e gastonan di personal permisibel, a base di e acuerdo cu tin cu Hulanda.
A otorga 11.7% parti den 6% di aumento entrante prome di juli y e restante 5.7% lo wordo incorpora den e salario di januari, 2025. Tur e otro primanan cu ta yega na un suma di un poco mas cu 6 mil florin anualmente ta keda vigente. E suma cu e 6% ta encera a inclui caba den e voorjaarsnota cu ta na caminda pa parlamento.
Den e mesun nota aki a inclui 2.8 miyon florin pa aumenta reparatietoeslag y bijstand, pa duna bek algo pa e perdida di forsa di compra cerca un otro grupo den comunidad.
Awo ta bay traha riba un forma pa e parti di indexering ta structura, segun e mandatario a bisa.
Edward Maduro (SADA) den nomber di e sindicatonan a bisa di ta satisfecho cu a yega na un acuerdo riba e punto aki pero cu tin otro aspectonan cu mester sigui papia riba nan. Sinembargo no a splica durante e conferencia di prensa oficial, unda no a invita tur prensa, a base di kico no a sigui presiona pa haya loke tabata nan punto di salida.
Pa relato amplio lesa TREMPAN.
