Gobierno a bin cu Fondo Asistencia Social di Emergencia (FASE Desk) cu e meta di duna yudansa social na momento cu e situacion di Coronavirus a surgi y a hunga un rol grandi riba Aruba su economia. E yudansa social aki ta pa tur cu ta bin na remarca, cu a perde trabou y ta cumpli cu e condicionnan stipula.
Desde a bin cu e Fase taskforce, riba e prome dia nan a ricibi 7 mil yamada, poniendo e sistema crash segun SETAR. Esaki a trece como consecuencia cu e prome dia di Fase help desk online tabatin problema. Desde e prome dia por a mira e desesperacion y necesidad p’e consecuencia di Coronavirus.
A traha dia y nochi pa logra e FASE Help Desk funciona y ‘esey ta gradici tur, segun Minister di Asuntonan Social, Glenbert Croes. Dia 29 april e prome 3111 ciudadano a ricibi transfer di e pago, y dia dia 30 april lo sigui cu e siguiente pagonan y despues otro siman pasobra dia prome di mei ta dia liber. Lo sigui haci esaki dia pa dia mirando esnan cu ta cumpli cu e rekisitonan. Lo informa Corsou y Hulanda di e ayudo cu un famia mester di dje.
E mandatario sa cu 950 florin no ta hopi, pero lo yuda. Tambe lo tin pakete di cuminda, sea ta den bon di cuminda. E Gobierno ta traha hunto cu Elmar, Setar, WEB, esta compania estatal pa yuda. Tambe a traha cu Sedeco, ex DHC, hunto cu fundacion di cas of apartament pa tin comprension. Segun Croes, no ta bisa pa no keda sin paga, pero pa yega na un areglo nobo di huur.
E prome pago di esnan cu a aplica na e FASE a sali y cada dia lo haci transfer di esaki segun termina e proceso. E mandatario a reitera cu e meta ta pa hendenan haya yudansa necesario, p’esey a pone esaki riba presupuesto. Esnan cu no cualifica pa bin na remarca p’e fase, ta bin na remarca pa haya un onderstand. E Departamento di Asuntonan Social ta trahando riba esaki.
