E famoso Dj Hulandes Martijn Garritsen conoci como Martin Garrix ta na Aruba cu vakantie. E tin por lo menos dos pa tres dia riba nos isla caba y lo keda un dia mas. Siman pasa ainda e tabatin un show na Bogota, Colombia. Mayan dia 29 di februari e ta sali for di Aruba direccion Bolivia, djey e ta sigui pa Pero caminda e tin un show dia prome di maart djey 2 di maart pa Chile.
E ta na Aruba caminda su amiga personal, kende ta nos orguyo nacional, Sarah-Quita Offringa ta guie tur rond di nos isla. Aunke riba su pagina di Instagram e no a pone cu e ta na Aruba, por ripara claramente e “story” nan cu el a publica cu ta trata di un di e miho beachnan na mundo, esta na Aruba. Hasta a el a bishita San Nicolas caminda el a pasa pa saca potret n’e mural di Sarah-Quita.
Brian Koolman di 24ora.com a topa cu ne durante su ultimo dia riba nos isla. E tabata disfruta di un cerbes c’un lamunchi hunto cu su ekipo di trabou, amigo y entre nan Sarah-Quita mes. A opta pa no haci un entrevista cu ne, mirando cu e tabata den su zona di privacidad y ningun hende tabata molesti’e. A ricibi “green light” for di doño di e bar caminda e tabata na Nicky Beach p’asina saca un potret cu Martin Garrix. Di un forma masha humilde el a acepta e peticion pa saca potret.
Tocante Martin Garrix
Martijn Garritsen ta nace riba 14 di mei 1996, e ta un den e top e diskjockey (DJ) miho di mundo. Na varios ocasion e tabata number 1 pero ultimo a baha di posicion pa number 3 miho di mundo. El a bira popular na aña 2013 cu su cantica Animals apenas ora e tabatin diesshete aña. Garrix ta toca den e festivalnan mas grandi di mundo, entre otro Tommorowland, Ultra Festival y Coachella. Apart cu e ta organisa su propio shownan tambe. Na maart proximo e ta na Miami, den e Ultra Miami Festival.
