Debi cu prijs di gasolin ta subiendo constantemente, mescos cu otro gasto escencial di bida, gerencia di Wind Creek a tuma e decision pa emiti un bonus adicional na tur trahado di tur nan hotel- y casinonan na Merca, Corsou y Aruba. Cu esaki e compania ta sostene su trahadonan cu a bay atras den poder di compra, sin cu nan por yuda.
E compania ta conoci pa ta masha pendiente di trahado y a demostra di ta para band’i su trahado ora nan mas mester di dje. Asina den pandemia a sigui paga tur trahado 100% di salario y no a baha ningun luna. Ora a habri espacio pa recluta, a duna sign-up bonus cash pa tur cu a dicidi di join e famia di Wind Creek. Y ora a bira importante pa vacuna pa hotel por habri bek, a pone un bonus di $300 pa cada un cu vacuna. Claro cu e Afl. 525 no a baha malo.
Pa Aruba, esaki ta nifica $1500 pa cada trahado den servicio completo, cu ta riba mil empleado. Riba dje, tur trahado part-time lo cobra $750 na bonus. Pues e hotel y casinonan na Aruba hunto lo paga mas di $1.500.000,= na bonus adicional, riba e salario regular di cada empleado.
E hotel- y casinonan na Aruba ta bayendo bon y ta recuperando miho di locual a anticipa. Regularmente e hotelnan ta 100% of casi completo, debi na e empeño di e departamento di benta di e hotel, banda di e servicio excepcional cu ta brinda huespednan. Hopi huesped ta opta pa regresa pasobra ta encanta cu e nivel di servicio.
E compania Wind Creek Hospitality ta pertenece na Poarch Band of Creek Indians di Merca a cumpra e hotelnan y casinonan di Renaissance di Aruba y Corsou na aña 2017 for di MetaCorp. Renaissance Aruba ta conta cu 431 camber mientras cu e hotel na Corsou tin 237 camber. Ambos tin casino tambe pega na e hotel. Na Aruba tin riba mil empleado den servicio directo di e compania.
