E Conseho di Minister nobo lo consisti di 8 minister of 7 minister pero sigur no 9 minister, asina Minister-President demisionario, mr. Evelyn Wever-Croes a menciona ayera durante un conferencia di prensa. Ley ta bisa cu e conseho di minister por tin te cu 9 miembro, pero e realidad ta cu solamente un bes den historia politico di nos pais, a yega di tin un gobierno dje grandi ey. Bisando esaki, tin algun politico cu ta aspirando e puesto di minister, cu lo no logra esey den e gabinete nobo.
Ta sali for di e punto di bista e ora cu MEP lo tin of 5 of 6 minister mientras cu nan partner den coalicion, partido RAIZ, lo drenta e gabinete cu dos minister. Dan gabinete Wever-Croes I, partido MEP tabatin 5 minister, esta Evelyn Wever-Croes, Xiomara Maduro, Dangui Oduber, Chris Romero y Glenbert Croes. Cu salida di Chris Romero for di lista di MEP, tin un puesto vigente, den caso cu mantene e cantidad di ministernan na cinco pa e partido mayoritario den e gabinete.
Pero den caso cu amplia e pakete di MEP y bay na 6 minister, e ora lo tin dos candidato cu chens pa bay cu e puesto di minister. Ta trata aki di Rocco Tjon, Arthur Vallejo, Hendrik Tevreden y Endy Croes. Mester menciona cu den voto, Endy Croes tin mas cu tur y ta e unico cu a crece den MEP despues di e lider. Pero, e ta esun mas abou riba e lista, pasobra e tabata candidato # 8 durante e ultimo eleccion. Aunke e ta zona un decision facil, e realidad awor ta cu tin bastante “rancamento di siboyo” pa por bira minister. Asina mes awe formado a hacie cla pa tur hende, incluyendo a su mesun candidatonan, cu e no tin pensa di amplia e gabinete!
Internamente awo e mesun tema di voto riba number ta bolbe surgi. Tradicionalmente, ora di nombramento di minister, ta e prome candidatonan riba lista ta bay cu e puestonan ey. Ta subraya cu esey ta tradicionalmente, pasobra e no ta mara den ningun ley of protocol cu e mester ta asina. Legalmente e parlamentarionan ta drenta e organo si nan saca nan mes den voto of a base di nan number. Pero den Conseho di Minister e no tin nada di haber ni cu number ni cu voto, pero den pasado semper esunnan cu mas voto of mas halto riba lista ta haya e chens pa bira minister.
Pa mas informacion y detaye, lesa e edicion di TREMPAN di awe.
