IBiSA a organisa dia 28 di mei na BTA na Eagle resort e prome serie di 4 torneo di Beach Tennis Escolar. Esunnan cu a participa tabata Scol Basico Washington, Colegio San Hose, Prinses Amalia Basisschool, Mon Plaisir Basisschool, Colegio Sagrado Curason, Cacique Macuarima, Colegio Laura Wernet Paskel y Basisschool de Shakel. E torneo aki a consisti di 22 team di mucha muhe den categoria B cu ta pa e muchanan naci entre aña 2007 y 2009.
E torneo a wordo hunga riba 11 cancha di beach tennis y den sistema di poule. E studiantenan cu tabata competi, ta e muchanan cu nunca a practica e deporte aki. Meta di deporte escolar ta pa stimula actividad fisico y promove deporte cu na e momento aki ta beach tennis.
IBiSA y Beach Tennis Aruba ta felicita e ganadonan:
Na prome luga a keda Naiva Kock y Anabelle Fernandes representando Scol Basico Washington.
Na di dos a keda Eirian Teepe y Zinnia Ras representando Colegio Sagrado Curason.
Na di tres luga a keda Aliyah Estrada y Kayleen de Cuba representando Colegio Sagrado Curason.
IBiSA ta gradici e instructornan di Caribbean Beach Tennis School pa entrena y organisa e torneo di Beach Tennis Escolar
