E siman a cera cu dos sucedido unda cu clientenan di ELMAR a sinti e efecto pa motibo cu tabatin un interupcion den suministro di coriente.
Esun fastioso sigur a tuma luga den oranan di anochi.
Den oranan di mainta por a lesa riba Facebook diferente mensahe, cu coriente a bay atrobe, mientras cu otronan ta menciona di un parti cu tambe a sinti e efecto di e problema pero e dia anterior ya caba tabatin un problema cu e suministro.
Esun di diahuebs a sosode den area di General Mayor de Bruynewijk, Cura Cabai y, Brazil y bisindario, rond di 7.45 di mainta. Te casi 5.30 di atardi tur hende a haya coriente bek.
E tecniconan mester megger e kabelnan di tension halto pa por identifica e problema pa restaura e suministro di coriente mas pronto cu ta posibel. Y esaki a dura basta largo. Diabierna mainta tabatin un problema diferente. Esey tabata na Sero Pita unda cu tabatin un accidente y a afecta un area eybanda. Mester a cambia un poste di coriente / luz.
Pero esun di ayera nochi sigur tabata uno fastioso. Den careda di 8’or di anochi di repente coriente a bay den area pabou na Playa. Rond di Schelpstraat. Por a nota cu na algun sector tabatin coriente un banda y e otro banda nobo. Y hustamente den un area unda cu tin hopi negoshi, tanto restaurant como establecimentonan di diberticion. Esaki a causa hopi disgusto, ademas di benta cu ta perde pero tambe e hecho cu den e dianan aki ta haci un calor inmenso.
Despues di un ora e coriente a bolbe. Por a tuma nota di tecniconan di ELMAR trahando na e substation na e parti pabou di centro di ciudad.
E disgusto ta sigui crece pasobra na momento cu e tin di haber e ciudadanonan tin comprension pero pa otro problema, e pasenshi ta cabando.
