Contrario na locual Aruba Food & Beverage Association mes a bisa durante un conferencia di prensa siman pasa, awo e directiva a sali pa aclaria e locual “eigenlijk” nan mester a bisa. Ey nan vocero a bisa cu un “dishwasher” ta cobra mas o menos tres mil florin pa luna, subrayando cu nan ta bon paga, pero toch no tin interes.
Wel, despues di e entrevista aki, mayoria restaurant a haya nan bou presion interno, debi cu casi niun ta paga nan trahadonan e salario aki. Hasta sindicato a cay aden y a conclui cu mester bay mesa di negosacion bek pa renegocia e contractnan laboral existente, unda labado di glas y tayo no ta yega na e salario menciona na publico. Consecuentemente, e vocero a hay’e ta hala su declaracion atras mesora.
Di acuerdo cu Aruba Food & Beverage Association (AFBA), locual de facto nan a manda nan vocero bay enfoca riba dje tabata riba “labor shortage issue”, pues scarsedad di trahado. Pues AFBA den un relato emiti riba diadomingo a clarifica bisando: “Locual a menciona ta e caso di loke un (1) miembro mester a haci pa por a sigura su mes un dishwasher. Esaki a wordo saca for di contexto”.
Di otro banda, AFBA a subraya su compromiso pa apoya un salario husto den tur sector di cuminda y bebida y ta ahusta su mes na e norma estableci den mercado.
Mester menciona cu e conferencia di prensa di AFBA sigur no a logra e meta estableci, pa hala atencion cu tin scarsedad di trahado den mercado laboral. Mas bien el a bira un “cherche” pasobra niun hende, por lo menos den e comentarionan, a kere den nan declaracion. Es mas, mesora a diseña un sin fin di “memes” den cual ta compara cu un “dishwasher” ta gana mas cu un polis cu caba di subi caya pa sirbi su pais.
Probablemente e meta di AFBA ta pa por promove mas interes den comunidad pa traha den e sector di cuminda y bebida, of pa Minister di Integracion revisa su maneho na DIMAS y DAO pa cu otorgamento di permiso di trabou y/pf estadia na Aruba. Minister Glenbert Croes a priminti flexibilidad, pero ora haci peticion na e departamentonan, e maneho ta completamente diferente, burocratico y complica, banda di e realidad cu permisonan ta tarda masha hopi pa sali of ta keda sin sali mes.
Aruba Food & Beverage Association ta un asociacion profesional cu ta salvaguardia e interes di su miembronan, ta mantene relacion cu gobierno, ta promove e industria di cuminda y bebida y tambe ta provee oportunidad di educacion y entrenamiento na profesionalnan y studiantenan cu ta aspira un futuro den e industria. Nan miembronan ta consisti di bar, restaurant, cafe y otro establecimentonan den F&B. Nan Chief Operating Officer ta Miriam Dabian, mientras cu nan directiva ta consisti di Carolina Merryweather como presidente, Kevin Slangen como vice-presidente, Stefan Legger como secretario, Stefan Oosterwal como tesorero, mientras cu Nathalie Moore, Pierre Kock y Patrick van der Berg ta miembro di e directiva.
