Aña pasa pa diferente motibo, incluyendo e pandemia di Covid-19, Dr. Horacio E. Oduber Hospital no por a organisa nan evento usual di empleado di luna. Pero na fin di 2020 a dicidi cu ta saca empleado di aña 2020 y no a duda nungun momento pa start bek cu honra nos colega nan di e bunita forma aki. Y e prome colega cu a haya e bunita honor di ta empleado di luna di januari a resulta den enfermero Dwight Lopez. Su coleganan a bini hunto y sorprend’e y su reaccion tabata super emociona!
Jacco Vroegop, director di hospital, conhuntamente cu mas colega cu ta aprecia Dwight masha hopi, a inform’e cu e ta e empleado di luna di januari 2021. E ta purba pa semper yuda tur hende y e ta un bon team player riba departamento Niet Snijdend 2. Zorgmanager di Dwight Lopez, esta sra Esther Mennen a duna di conoce cu e ta un bon nurse. E tin hopi pasenshi y respet pa pashentnan. “E ta purba yuda tur hende y e ta echt un persona humilde,” e manager a expresa emociona. E meta di Dwight ta pa brinda e miho cuido posibel, e ta haci su maximo esfuerso, nada p’e ta di mas. Dwight ta un nurse cu tareanan di coordina, pues e ta duna guia na un team tambe. Y mas importante e ta un persona cu por conta riba dje.
Dwight Lopez a duna di conoce cu e dia a cuminsa un tiki druk, unda como team nan mester a tuma accion pa salba bida di un pashent y ta drenta merdia y ta haya e tremendo sorpresa aki. “Ainda mi no por proces’e,” Lopez a duna di conoce. Traha na hospital ta algo interesante. Dwight tin tres aña na Hospital y e no a spera di tin un team y un departamento asina leuk, pero tambe di tin un zorgmanager dinamico.
Te cu awo Dwight no tin nada di keha, paso e ta crece tur dia danki na u zorgmanager, pero tambe e ta gradeci paso e tin un bon team cu ta traha bon cu otro. Tur esaki ta percura cu e lo sigui crece durante e proximo añanan. E ta gradici su zorgmanager, su team y coleganan, pero tambe e pashentnan cu tabatin cosnan positivo di bisa di dje. Na esunnan cu kier bira empleado di luna, sigui traha duro y lo bo logre!
