Departamento di Salud Publico di Aruba no ta stop di enfatisa riba e importancia di tuma e vacuna contra COVID. Na Aruba nos ta mira claramente con efectivo e vacuna ta. Si tuma nota cu e populacion di 12 aña bay ariba na Aruba, un promedio di 67.5% ta vacuna, toch ta e minoria cu no ta vacuna ta esunnan cu ta test mas tanto positivo y tambe ta rekeri cuido medico extra.
Departamento di Salud Publico ta traha y fiha su maneho basa riba data y analisis pa cual motibo e informacionnan aki ta veridico y ta guia DVG pa sigui promove e aplicacion di e vacuna como e miho forma di prevencion.
Pa loke ta categoria di edad di esunnan vacuna na Aruba, DVG ta observa cu entre edad di 45 cu 80 aña, mas di 70% di comunidad ta vacuna, loke ta positivo. Pero toch e porcentahe desea ta riba 85%. Loke tambe DVG ta observa ta e categoria di edadnan cu ainda ta vulnerabel, cu ta entre 12 cu 44 aña y tambe 80 aña bay ariba, cu ta bou 70% di vacunacion.
E vacuna di Pfizer cu Aruba ta suministrando, ta dunando resultado. Segun datos di dia 9 di juli cu di un total di 803 caso positivo, unicamente 6 persona vacuna (18%) ta interna den hospital pa cuido medico, di cual ningun (0) ta interna den unidad di cuido intensivo ICU. Mayoria ta na cas recuperando rapido sin nesesidad di cuido medico extra.
Pa e motibo aki cu DVG ta sigui enfatisa riba e importancia di vacuna contra COVID y ta haci un apelacion riba comunidad, specialmente entre edad di 12 cu 45 aña y tur persona cu ainda no a vacuna, pa vacuna mas pronto posibel. Haci bo cita via www.dvg.aw of via Aruba Health App.
