Diaranson anochi a tuma luga un reunion na Plaza Betico, na e cede di SMAC. Aki ta caminda cu Presidente di SMAC, Darren van Ommeren a yama tur e musiconan pa reuni riba festival di Tumba 2024. Un bon iniciativa y di un forma democratico a scucha kico ta e deseo di e musiconan y kico nan kier mira otro. A pasa riba reglamento completo y hasta a haci adaptacion caminda tabata mester. Durante e reunion, a aproba di un forma unanimamente cu lo permiti hurado di Corsou hunto cu esunnan di Aruba pa husga e musiconan durante e festival. E Tumba contest riba su mes tin tur indicacion cu lo continua den Balashi Beer Garden.
E musiconan ta aplaudi e forma con SMAC a trece e musiconan hunto pa scucha nan opinion y pa haci caso di nan tambe. E meta final ta pa mehora y trece un miho calidad di festival pa e pueblo di Aruba. E union ta importante, claro semper tin diferencia di opinion pero na final di reunion tur hende a bay cas cu claridad. E reunion a tuma luga riba un dia special, riba dia di e musiconan.
E festival riba su mes di aña pasa no tabata malo. Pero e musiconan y SMAC ta bogando pa hib’e na un otro nivel. “Como amante di tumba, ta importante pa mantene como parti di nos cultura”, asina Rocco Franken a vocifera. Ta importante pa trece iniciativa pa trece cara nobo y banda nan nobo pa tambe participa.
E musiconan tambe a trece algun idea pa SMAC pero den e dianan nos dilanti lo tin mas informacion riba esaki. Un di e puntonan cu a trata ta e parti di mercadeo. A acorda cu desde un fecha stipula por cuminsa propagando e Tumba via rednan social, claro via un forma responsabel, no pa publica henter e Tumba sino maske ta un parti pa cuminsa laga e pueblo sinti na e cas cu e cancion.
Na 2020 tabatin como 500 persona cu a atende e festival y bou maneho di Darren van Ommeren a sa di hiba e festival te na 1400 persona e aña aki den e festival. Cos ta canando den un bon direccion y e meta ta keda pa engrandece e festival mas ainda. Tabatin 13 cantante y 9 banda e aña aki y ta premira pa e bira mas hopi pa e proximo edicion. “Nos intencion ta puro pa engrandece e festival”, asina presidente di SMAC a vocifera. E festival lo tuma riba 20 di januari, ta invita un y tur pa sigui e plataforma di SMAC p’asina ricibi tur informacion relaciona cu e festival aki.
