E sentencia den caso Apollo 2, asesinato di Poentje Castro dia 23 di december 2010, tabata un sla duro pa Ministerio Publico. Diamars hues a declara e acusado Anderson Rasmijn liber pa falta di prueba contundente. Tin duda y mientras cu tin duda, no por condena un persona.
Ley ta bisa cu pa un persona wordo condena, e sentencia mester bisa cu a keda proba legal y convincentemente. Den e caso aki, Hues no por a yega na e conclusion aki despues di a scucha e ponencianan di Ministerio Publico y di defensa.
Di 16 aña pa liber ta algo hopi grandi. Na salida di Corte mr. Yolanda Pronk, kende no tabata e fiscal cu a trata e caso aki, a bisa cu nan a tuma nota di e sentencia. El a splica cu nan tin dos siman pa tuma un decision kico ta bay haci cu e caso aki. Internamente lo haci un evaluacion hunto cu e fiscal cu a presenta e caso pa dicidi kico lo bay haci.
Informacion cu 24ora y TREMPAN a ricibi ta mustra cu for di momento di e investigacion inicial na 2010 / 2011 tabatin duda. E polisnan no tabata mucho contento, pasobra no a detene e homber Anderson Rasmijn como sospechoso principal e tempo ey. Pero fiscal di su banda a bisa cu e pruebanan presenta, di loke a saca den e investigacion inicial no a dun’e caminda pa cana. Esaki tabata e motibo cu e no a presenta e caso dilanti mesa berde, pasobra lo a yega na e mesun conclusion 12 aña despues, esta ayera. No tin prueba contundente cu a bini dilanti den e investigacion of den e proces-verbaal pa hiba e caso dilanti mesa berde.
Un fiscal nobo a haci su esfuerso, bou di presion pa soluciona e caso, pero e tambe a traha cu material deficiente cu tabata dificil pa bay busca informacion di mas cu 10 aña atras. Inclusivo el a admiti den Corte cu cos no a bay manera debe ser y hasta e proces-verbaal original a disparce manera por arte di magia.
Pa e famia esaki tabata un sla duro. Nan tabatin speransa cu por a saca afo pakico a mata nan tata. Pero no a logra y tampoco a logra haya e satisfaccion di un condena pa e persona cu a bisa ta esun culpabel.
Aki dos siman lo haya sa si Ministerio Publico lo apela.
