E informacion cu minister di salud publico tabatin na momento di su conferencia awe mainta ta cu tin sigur 100 caso positivo nobo di COVID-19. E ta wanta su man na su curason cu e piek aki y si e mester sigui e siman aki.
E cifra, minister Dangui Oduber a bisa, no ta oficial ainda, pasobra mester ricibi resultado di clinicanan priva, pero e ta kere cu ta bay tin 100 caso positivo. Esaki ta pone cu gobierno ta evaluando medidanan nobo. Diahuebs awo tin e Crisisberaad durante cual lo evalua e situacion. Pero si yega 100 caso positivo awe, e lo pasa e 400 caso activo cu ta motibo di mas preocupacion. E ta algo cu a pasa aden caba den luna di september ultimo. “Esey no ta nifica cu nos ta bay keda man crusa. Ta bay haci un evaluacion di e situacion, di kico ta ta proyecta pa e proximo simannan, pero tambe ki medida ta necesario pa wanta e plamamento di e virus. “
A anticipa e situacion aki, segun e mandatario, y esey tabata e motibo cu a introduci Toque De Queda. “Sino e situacion lo por ta pio.” Si e ta pidi pa comunidad pa adapta y focus riba evita plamamento di e virus, manera cu a logra haci den e di dos ola di augustus / september.
E miedo cu autoridadnan tin ta si sigui cu mas piek di 100 caso tras di otro. Unabes cu tin tres piek tras di otro, por considera cu esaki ta e di tres ola di contagio di COVID-19 na Aruba.
E contagionan di e ultimo siman y dianan ta mustra cu e casonan a subi demasiado lihe. Esaki ta causa door di cluster den sector di famia. Bishita di casnan unda cu tin hendenan a bini for di exterior. Pues tur cos ta indica cu esaki ta un ola importa.
