Durante e conferencia di prensa di Gobierno tabata presente e representante di Huisartsen Vereniging Aruba (HAVA) dr. Van Trigt, kende den cuadro di discusionnan di reapertura di scolnan a papia riba e contagio entre muchanan. Datonan disponibel te awo ta mustra cu e cantidad di muchanan contagia ta minimo y no tin caso registra di contagio entre muchanan mes.
Ultimo tempo tin hopi preocupacion si scol habri y con ta bay atende cu distanciamento social y reglanan di higiena. P’esey den su splicacion, van Trigt a tuma datonan di Aruba ya haci un comparacion cu cifranan cu tin disponibel di Hulanda. Den e comparacion cu el a haci na Hulanda, a menciona cu tin 41.319 caso registra mientras cu na Aruba e ta 101. Na Hulanda a interna 11.153 persona mientras cu na Aruba e tabata 16. Na Hulanda niun mucha bo di 10 aña a fayece.
Den e categoria di 0 pa 4 aña tin 71 (0.1% di e total) mucha na Hulanda diagnostica cu COVID-19 mientras cu Aruba no tin pashent di e edad ey registra. Den e categoria di 5 pa 9 aña Hulanda tin 15 pashent di cual 11 interna mientras cu Aruba tabatin 2 pashent y ningun interna. Den e categoria di 10 pa 14 aña Hulanda tabatin 51 pashent cu Covid-19 y Aruba 5. Di e total di pashentnan positivo, 4% so ta cay den categoria di mucha. Nan ta haya sintomanan diferente of leve compara cu adultonan.
Di e analisis haci localmente por a constata cu semper mucha ta contagia via di adulto. No tin caso registra di contagio entre mucha ni di mucha pa adulto. “Esakinan ta datonan importante pa ora di pensa na habri scol di kico e riesgonan ta,” van Trigt a comenta. Datonan di Organisacion Mundial di Salud (WHO) mes ta mustra cu muchanan no ta infecta lihe y no ta haya complicacion grave door di Covid-19. Mortalidad bou mucha ta hopi abou mes, ni bou di esnan cu un problema di inmunidad. E rol di muchanan den e pandemia ta hopi chikito.
