Diasabra mainta trempan a nota funcionario di Dienst Openbare Werken Aruba (DOW) riba pia. Ta relaciona cu kavel. Ta despues cu Directie Infrastructuur en Planning (DIP) a otorga 216 kavel pa publico. Entre nan, 80 riba Vondellaan y 136 riba L. G. Smith Boulevard.
Tambe a otorga como dies permiso pa vent y cuater pa prensa por transmiti. E biaha aki e proceso di anuncia ken a haya kavel a bay di un forma diferente.
Antes via transmision bibo cu presencia di notario, ta anuncia nomber y fam, adres y hasta number di telefon. Aruba completo por a mira di un forma transparente ken a “corona” cu kavel p’e periodo di carvanal. Bo tin cu paga pa ta den wega y claro, bo mester por conta cu suerte tambe. E biaha ki, a hacie di un forma diferente.
Director interino, Marilynn Dirksen a dicidi cu lo aplica algun protocol y regla nobo di privacidad cu tin mundialmente. Privacidad di cada persona ta importante y debi na desaroyonan internacional, a dicidi di aplic’e na Aruba tambe.
Claro, ora tin cambio, e ta bin cu resistencia. Gran parti di e pueblo no a gusta cu no por a mira ken si a haya kavel, por lo menos esunnan cu NO a haya ta rabia. Hasta Dirksen su ex-hefe y actual sospechoso, Otmar Oduber a cuestiona e forma con a otorga e kavelnan. DOW a spuit number di e kavelnan cuminsando riba Vondellaan pero djey lo sigui pa L. G. Smith Boulevard.
