Desde marduga awa ta cay, pero a topa cu situacionnan cu awa a keda para. Riba Watty Vos Boulevard awa a keda para y p’esey a cera e caminda. DOW a diseña e trabou y a bay destaho publico unda ta otorga e trabou na esun mas barata. Pero door di e yobida y cu no por a uza e caminda, DOW lo boet e contratista y esaki lo tin un costo di 10 mil florin pa cada actie punt.
Marlon Croes, director di DOW, a splica cu a transferi e riesgonan di diseño, riesgonan di construccion, riesgonan di financia y riesgonan di mantencion for di gobierno pa sector priva. Compania priva ta bin cu diseño y present’e, pero gobierno no ta aproba diseño, ni plan di mantencion ni metodo di construccion ni financiamento. A cumpra e servicio di esun cu ta bay hacie.
DOW a informa e contratista pa tene cuenta riba loke ta bay traha no ta cumpli cu rekisitonan. Ta duna e conseho ey pa asina e contratista sa kico ta bini. E contratista ta esun cu a splica con cosnan ta hinca den otro, p’esey DOW ni gobierno ta duna nan input pa evita cu e responsabilidad ta cay riba nan. Den e caso aki asina a traha e contract cu e compania. E team di DOW a controla tur caminda y tur cos nota di e deficencia.
Ta drenta den un fase di bay prepara y analisa un carta p’e contratista. Lo inform’e cu e caminda no ta disponibel pa uza, p’esey ta bay aplica puntonan di boet, tambe lo indica cu no a garantisa e siguridad, tin awa riba caminda cu a stroba e drenahe y di cuater tin washout di tera riba caminda. Den mundo di PPP e contratista a bisa di cumpli cu rekisitonan, pero den practica e contratista ta keda mantenen e caminda p’e proximo 20 aña. Esey ta nifica cu e compania no por bandona Aruba.
Door di aplica e boeten punten, e ta un financial incentive pa coregi y forsa nan drecha loke ta malo den e infrastructura. Si DOW a trah’e den forma tradicional, e responsabilidad lo a cay completamente riba nan. E compania tin di drecha henter proyecto bek riba gasto propio, asina Croes a bisa.
