Diabierna mainta tempran un team special di Polis a tira un inval den un compleho di apartamento na Sabana Liber, esta El Conquistador. Autoridadnan ta en busca di mas persona sospecha di ta envolvi den e atraco cometi recientemente na Little Europe.
Recherche a bin ta trahando duro den investigacion di e atraco comete riba Little Europe dia 17 di october ultimo. Esey tabata di tres biaha cu e joyeria ta bira victima di ladronnan. Locual tabata remarcabel ta cu e sistema uza tabata e mesun cu e atraco anterior. Nan a yega den un auto horta, a laga esaki despues banda den e rooi banda di Aruba Juniors y a huy den un otro vehiculo cu tabata wardando riba nan.
For di e dia ey a bin ta trahando duro y a yega na detencion di dos persona caba. Un di nan ta un Arubiano y e otro ta un Venezolano. Interogacion pisa a conduci a logra saca informacion toch balioso pa investigacion y asina a yega na e adres na e compleho di apartamento El Conquistador, en busca di un atracado cu falta ainda.
Diabierna madruga pa mainta, a drenta e compleho unda cu a rista varios apartamento. A detene sigur dos persona relaciona cu un of mas delito, inclusive pa e caso di Little Europe. Ambos ta stranhero.
Pa mala suerte di un otro grupo, a bin haya mas persona kendenan no por a mustra nan documentonan di ta kedando legalmente na Aruba, pa cual a hiba nan Warda di Polis, unda ta pone nan den man di persona di Guarda Nos Costa cu lo sigui cu e investigacion.
Na e sitio na Sabana Liber por a mira Polisnan tecnico tambe y demas funcionarionan di husticia. No a haya ningun arma di candela cu esnan deteni.
Manera por corda, dia 17 di october den oranan di merdia, dos persona arma a drenta Little Europeo y bou menasa a bay cu cierto cantidad di joyas, cu no a wordo menciona nan balor te cu aworaki. Den pasado tabatin diferente caso similar, atraconan arma, cu a tuma luga na añanan 2016 y 2017, den cual mayoria tabata stranhero. Den e casonan ey tabata algun Arubiano, y stranheronan biba na Aruba, cu a contrata of a busca e Venezolanonan (ilegal) pa ehecuta e atraconan aki. Esnan haya culpabel a haya condenanan cu ta varia di 3 te cu 12 aña.
