E conocido paleis di domino n’e grens entre Calabas y Kudawecha, e ya mundialmente famoso Domino Square Garden, ultimo tempo a bira un fabrica estilo ‘lopende band’ di weganan grandi den domino. Diasabra awo, dia 28 di mei, no solamente lo tin final di Champion’s League, pero dibiaha su tras cuminsando pa 7:30 pm lo cuminsa e confrontacion tan spera entre e dos eterno rivalnan Team Snor y Team Sero Blanco.
Den cuadro di Champion’s League, mester duna Snor credito di tin e berdadero ‘never give up mentality’ cu hopi biaha bo ta wak cerca futbolista. Si den di 90 minuut ainda bo ta kere ta posibel pa score dos gol tras di otro pa saca un verlenging afo, anto Snor t’e guy cu ainda cu score di 5 -20 ta haci tur posibel pa logra 16 punta den overtime!
Di un otro banda, Team Sero Blanco a demostra hopi biaha di ta e team cu e mentalidad clasico di ‘Yes We Can!’Cua team cu yega ta haya semper un bataya fuerte cerca Team Sero Blanco y no ta prome biaha cu Team Sero Blanco a pone ekipo di nomber para stret den nan sapato! Y ta p’esey, p’e amantenan di domino na nivel mundial, diasabra awo 28 di mei, ta manera hamber cu gana di come lo topa otro. Gasolin riba candela!
Niun ta baha cabes pa otro, locual ta priminti di ta otro anochi di sambombaso, di tension di corta rosea, ora e dos eterno rivalnan aki bati piedra ariba mesa.
Manera semper, e entrada ta completamente gratis y e ya famoso snacks di half time lo lora totalmente por nada ora cu diasabra anochi 28 di mei, cuminsando pa 7:30 pm na Domino Square Garden, Team Snor lo enfrenta Team Sero Blanco den un bataya estilo un pa tera un pa lama! Yega trempan pa bo haya bo stoel VIP.
