Mas tempran durante dia, awe, Bierna Santo, tabata tin un candela cu a causa daño na dos diferente cas. Miembronan di Cuerpo di bombero a domina e candela y nan ta pendiente pa investigacion cu mester bay tuma luga di parti di autoridad den e caso aki. Cuerpo Tecnico di Polis y tambe recherche mester a presenta y pa asina haci un investigacion.
Den un di e casnan, un camber cerca di e muraya a kima completo. E candela aki a crusa, pero afortunadamente bomberonan a traha di tal forma cu e candela no a sigui bay den e cas. E daño di candela a keda limita, pero daño di awa ta hopi.
Hefenan di polis di Noord tambe a presenta. Na momento cu tin algo serio, nan tambe ta mobilisa mesora.
E melding
Gino Tromp, kende ta e oficial na warda, a splica cu pa 12’or y 28 a haya e prome melding, cu tin un cas den Semeleerstraat na candela. A despacha un unidad pa cuminsa. Y despues esun di aeropuerto a bin pa yuda. Ora cu a yega, e cas tabata na candela, cu esaki tabata sali pafo y el a bay over pa e cas na banda. Ta dos cas cu a haya daño di candela.
Dominio
Bombero a sa di scapa bon parti di e cas. Limita e daño, manten’e na unda el a cuminsa. E no a sigui bay riba e otro parti di e cas. Si ta loke e cas a haya ta daño di huma y awa, naturalmente.
Slachtofferhulp tambe a presenta na e sitio pa atende cu esnan cu ta biba den e casnan. Polis tambe a papia cu entre otro esnan cu ta biba den vecindario y tambe esnan cu ta biba den e cas.
