Ayera tardi e atletanan di Landamento Artistica, Mikayla Morales y Kyra Hoevertsz hunto cu nan coach Ila Brandimarte, a biaha pa Merca, p’asina participa na un Campamento pa Duetnan. E ta patronisa door di PANAM Aquatics hunto cu USA Artistic Swimming.
E campamento aki lo tuma luga na e USA Olympic and Paralympic Training Center na Colorado, USA. Lo tin 65 atleta di mas di 20 pais ta participa. E coachnan cu ta guia e campamento aki ta Andrea Fuentes, (4x Olympic Medalist pa Spaña & acutal headcoach di USA Artistic Swimming), Bill May, (4x World Champion & headcoach di Santa Clara Aquamaids), Virginie Dedieu, (Olympic Bronze Medalist y 6x World Champion pa Francia), y Benoit Beaufils (4th place Mixed Duet Worlds). E campamento tin un duracion di 8 dia.
Despues di esaki Mikayla y Kyra lo sigi train durante un luna, hunto cu e seleccion nacional di Merca, na Los Angeles bou guia di Andrea Fuentes. Esaki tur ta parti di e preparacionnan pa Weganan CAC, cu lo tuma luga na otro aña na El Salvador.
