No ta un problema nobo, ta algun tempo caba cu polis ta presenta na Dominicanessestraat 17 pa problema di huur. Aki ta caminda cu un huurdo debe e doñ’i apartamento varios luna di huur. Segun e huurdo, e debe mas o menos tres luna, mientras cu e doño di apartament ta bisa cu nan deb’e como ocho luna of mas.
Cos a bay asina leu diasabra anochi mirando cu e doñ’i apartament a presenta y a kita awa for di e señora mirando cu e no ta ricibi su placa. E huurdo durante un entrevista cu 24ora.com a vocifera cu el a purba di yega na un acuerdo cu e doñ’i apartament pero no a logra. A bis’e cu e por pag’e pocopoco te ora e cumpli cu su debe atrasa.
E señora ta biba cu su yiu cu ta bay scol y un persona mas. E situacion no ta facil p’e mirando cu e no tin un trabou fiho y tur su gastonan ta cay atrasa. Polis a intermedia entre e partidonan. Ta compronde cu e situacion di pago di huur, pero no ta resolv’e problema cu agresion.
Den un transporte policial a hiba e sospecho pa warda di polis caminda lo present’e dilanti un subfiscal kende lo dicidi sea riba su encercelacion of libertad.
