E problemanan na Traimerdia no a finalisa. Scol a cera cu problema y a habri cu problema. Team di 24ora.com tabata na sede di Traimerdia na Sabana Basora unda cu por a mira cu propio wowo e situacion inhumano den cual no solamente e lidernan mester traha, pero tambe e studiantenan.
Net prome cu scol a habri, e lidernan di Traimerdia a bay prepara nan espacio di trabou, manera nan ta haci tur aña na inicio di un aña escolar nobo.
Pa sorpresa di e lidernan di Traimerdia Sabana Basora, nan a bin topa cu tur nan materialnan poni pafo, manera cos cu no tin pensa di habri Traimerdia. No ta conoci si esey tabata e intencion, pero e lidernan a trata di drecha e situacion. Sinembargo, e situacion no ta nada agradabel pa. Esey a pone cu enbes di e 80 mucha cu nan ta atende normalmente, mester a baha esaki.
Traimerdia a haya apenas dos trailer den cual nan mester bay ubica tur e muchanan di e 4 grupo cu ta bini eynan despues. Esaki ta nifica cu ta bay mescla muchanan di tur edad, cual sigur no ta duna e efecto desea. Tur e muchanan di tur sorto di doelgroep gepak ariba otro. Awo nan tin solamente dos grupo, uno di 27 mucha y otro di 24, pero bruha. Pa cada klas a pone dos lider, pues no segun e sistema cu tabata custumbra di traha cun’e.
E trahadonan no a wordo notifica di e situacion y a bin topa cu algo cu nan no tabata prepara p’e.
Lidernan mes sin haya niun notificacion mucho menos “mankracht” mester a lastra y pusha tur cos den trailernan, pa pone nan ariba un veld unda cu baño casi no ta accesibel, hopi leu, unda cu lidernan no tin bista ora e mucha bay baño. A pone nan riba un veld unda no tin dak. A priminti pa pone bañoe pero no a yega ainda. Supuestamente nan lo ta cla pa december, pero mientrastanto nan ta den un situacion fastioso. A pidi wc portabel y tent, pasobra e solo ta hopi cayente. E muchanan ta henter dia den solo, di un manera hopi inhumano.
Antes tabatin acceso pa e gymzaal, manera a wordo priminti, pero ainda tin hopi material eynan cu ta di Pieter Boerschool cu anteriormente tabata uza e instalacionnan aki. Awo a haya permiso di e scol Dorna Sol pa haci uzo di nan speelplaats.
Lidernan ta contento di awo ta hayando cooperacion di Dorna Sol cu ta haci e situacion un tiki mas miho.
