Nos ta den luna di october y tur persona por sa, specialmente e automobilistanan cu na e momentonan aki esnan cu tin un vehiculo di motor riba caminda, e belasting mester ta paga completamente.
Segun Meverly Romano, vocero di Departamento di Impuesto, segun cifranan ainda e no ta manera cu nan ta desea. Na e momentonan aki tin un total di 73.648 number registra cu si a cumpli cu e pago manera mester ta. Esey ta representa 84% y pa e grupo aki DIMP ta hopi contento cu nan a cumpli cu nos leynan manera cu ta prescribi. Esey ta hopi importante pa e departamento.
Sinembargo tin tambe un 13% cu no a cumpli at all. Nan ta faya, sea cu nan a cumpli mita aña so cu e pago, of nan no a paga nada mes pa full aña 2019. E 13% aki ta representa 11.097 number cu ta un cantidad basta halto, mirando cu ta na october caba aworaki.
E fecha final pa haci e pago di e di dos mita di aña a pasa na juli ultimo y awor aki mientras tanto ya nos ta algun luna mas leu y ainda e pagonan ey no a drenta.
Departamento di Impuesto ta haci un apelacion na e grupo di cliente aki, esta na e 11.097 cliente, pa nan toch haci e pago prome cu e aña bolter.
E personanan cu falta pa haci pago, sea cu nan no a paga nada of nan a paga solamente mita di e belasting, e personanan aki ya a haya un cobransa adicional caba. Kiermen nan tin un naheffingsaanslag inclui 50% di boet.
E boet no tabata algo necesario. Por ehempel si e cliente su belasting pa aña ta 300 florin y e tin 50 florin di boet, e tin en total 150 florin extra cu e lo mester bay paga. Esaki ta algo cu no tabata tin mester, si solamente e persona a cumpli na tempo. P’esey tambe semper ta anuncia cu ki ora cu ta bay bin un deadline pa por fabor, cumpli na tempo pasobra despues e ta causa cu e cliente ta paga mas di loke e mester paga. Ora cu aña cambia ta bin e belasting di 2020, si e pago di 2019 no ta haci of e no ta haci completamente, e cliente y lo mester bay cumpli prome cu 2019 prome cu e haya oportunidad pa paga 2020.
E ora e peso ta bay ta mas grandi si e cumpli na tempo cu su pagonan.
Den e parti di incumplimento, e categoria cu ta resalta mas hopi ta e categoria A. Tin 3.682 number cu tin pago di solamente mita aña riba nan. Pero tin 6.077 number cu no tin pago mes riba nan den e categoria A. En total tin 9.759 number cu no tin pago haci manera mester ta. Sea cu no a paga completo of no a paga mes. Esaki ta representa 13% y e ta un cantidad hopi halto. Si nos wak cu awor aki nos ta na october y cu e belasting mester ta paga full e aña, e ta un cantidad hopi halto.
E otro categorianan cu ta resalta pa loke ta incumplimento ta e trucknan di diesel. Tin 121 truck di diesel cu no a paga e belasting completo of nan no a pag’e mes. E ta 53 truck cu a paga solamente pa mita aña y 68 dieseltruck cu no a paga mes riba nan. E otro categoria cu a resalta ta e brommernan cu nummerplaat MFA. Tin 192 cu no tin pago mes riba nan. Esaki ta 8% di e categoria ey.
Un categoria cu ta basta halto ta e plachinan personalisa. Tin 115 registra cu no tin nada di pago riba nan na e momentonan aki. Esaki ta 18% di e categoria. Di e taxinan tin 54 cu no a cumpli. Tin 47 taxi cu a paga mita aña so y e 7 taxi cu no tin nada di pago mes pa loke ta 2019.
Tambe tin V-car cu ta en total 671 number cu no ta paga of no ta paga completamente. Esaki ta 14% den e categoria aki.
E otro categorianan tambe tin incumplimento, pero hopi mes. E mensahe cu DIMP kier duna na su contribuyentenan, na e automobilistanan, pa no laga e debe keda acumula y cumpli cu e pagonan manera cu ley ta prescribi. E ta hopi importante pasobra asina e contribuyente ta evita cu e ta haya un boet di 50% Na e momentonan aki e naheffingsaanslag a sali algun luna pasa caba. Kiermen e debe tey y no ta bay wordo permiti pa paga aña 2020 tanten cu 2019 ta paga completamente.
Resumiendo por bisa cu a logra toch cu mas cu mita, esta 84% si tin pago, 13% di automobilistanan no a cumpli of no a cumpli completamente. E otro 3% ta e personanan cu a entrega na plachi di number, pasobra nan vehiculo no ta den uzo.
Esey ta e situacion cu DIMP tin na e momentonan aki. Ta hopi importante pa por para keto un rato, vooral esnan cu no a cumpli ainda pa toch nan pensa un rato y cumpli cu e pago di e belasting aki.
Dispensacion
Na e momentonan aki, ni maske cu entrega plachi di number na Departamento di Impuesto, mester paga e belasting di e ultimo mita di aña. Semper e chens pa haya vrijstelling, e dispensacion di e belasting ta mara na e cuartal, segun Meverly Romando di DIMP.
Prome cu e cuartal cuminsa y si e plachi ta entrega, e persona por bin na remarca pa haya dispensacion di belasting, si e laga e plachinan aden pa un cuartal of mas.
October a cuminsa caba y nos ta den e e prome siman di october. Si entrega e plachi, e persona mester paga toch e ultimo cuartal di e belasting. Riba esey e ta laat caba. E ta bay ta pa semper tene na cuenta cu pa e cuartalnan venidero, pa tene na cuenta cu ora entrega e plachi mesora, pa asina no keda cun’e na cas, pasobra si keda cun’e, ta cobra toch.
Hopi hende sa reclama cu e auto tabata na garage, e no a core, no a uza e plachi. Pero DIMP esaki no ta valido. E ta valido na momento cu entrega e plachi. E ora por bisa cu e persona ey ta un candidato pa bin na haya dispensacion di belasting.
No ta pasobra cu el a entrega e plachi, automaticamente e ta haya dispensacion di belasting. Ta depende cuanto tempo e plachi ta keda na DIMP warda. Si e persona por ehempel ta entrega su plachinan prome cu januari cuminsa of na momento cu januari cuminsa, el a bin busk’e bek na februari, toch e mester paga e belasting. Pero si el a laga e plachinan na DIMP y a busk’e bek te na mei, e ora ey e prome cuartal e plachinan tabata completamente na DIMP, e ora ta haya dispensacion di e belasting pa e prome cuartal.
Ta depende con largo e plachinan ta keda cerca DIMP. E ora e cliente por bin na remarca pa haya dispensacion. Esey ta e unico manera cu tin pa por haya dispensacion. Cu e plachi, riba e auto na cas, na garage of otro sitio, no ta duna e cliente chens pa haya dispensacion. Esey ta importante pa tene na cuenta.
Tin persona cu kisas nan auto ta daña of tin hende ta bandona Aruba pa un tempo, sea pa vakantie of asuntonan medico. E ora ey nan ta wak caba cu nan no ta bay uza nan auto por ta pa seis luna. E ora ta recomendabel pa di biaha trece e plachinan DIMP. e ora por bisa cu na final di e periodo, ora cu e cliente bin bek Aruba y ta bay uza su auto, e ta busca su plachinan y ta haya su dispensacion di belasting e ora ey.
