Formularionan di Inkomstenbelasting 2017 ta cla y ta na caminda pa clientenan. Esaki Luenne Pietersz, directora di Departamento di Impuesto a informa.
Gerencia ta hopi satisfecho pa motibo cu a logra cumpli cu e meta interno poni pa tin esaki cla prome cu e fecha di añanan anterior. Pero lo no ked eynan pasobra e meta final ta pa hala e fecha di entrega di e formulario di IB te cu fecha di april / mei ora cu ta entrega of distribui e formulario di Winstbelasting (WB). Di e forma aki ta mehora e proceso interno pa e formulario por yega cerca e cliente. E directora tabatin masha palabra di elogio pa e team di Departamento di Impuesto cu a haci un esfuerso grandi pa cumpli cu e meta poni.
E aña’ki a saca en total 42.449 formulario di IB. Tin 1447 cliente cu ta biba den exterior pero mester declaracion nan entradanan aki na Aruba. Banda di esaki tin e grupo di 32.735 persona cu ta den e forsa laboral y cu a haya un “verkorte versie” y tin 8267 cu a haya e version amplio y cual ta esnan cu tin un “eenmanzak”. E fecha di salida di e formularionan aki ta 2 juli 2018, cual ta nifica cu mester entrega esaki pa 3 di september aworaki. Pero esnan cu no por cumpli cu e fecha menciona, ta haya un tempo adicional automaticamente di Inspector y lo tin te cu 3 di december, 2018 pa haci entrega di e formulario di IB. Pues menos cu aña pasa, ora cu a duna 6 luna di uitstel. E biaha aki a limit’e na 3 luna. A constata cu e tempo extra aki cu ta wordo duna no yuda pa e hendenan cumpli toch y ta keda mesun cos cu na ultimo ora ta busca e documentonan necesario.
Pietersz a splica cu fin di november y cuminsamento di december tambe ta e luna cu mester entrega e formularionan di WB 2017 y salanan na Departamento di Impuesto lo ta yen di cliente entregando e documentonan aki. P’esey e ta recomenda pa cuminsa busca di awo loonopgaf,comprobante cu yiu ta studiando, carta di interes.
Den luna di augustus SIAD ta bay pone un servicio extra unda cu ta yuda clientenan, cu ta bini na remarca pa esaki, pa yena nan formularionan di IB. Esaki ta wordo haci door di empleadonan cu a pone nan mes como boluntario pa yuda e clientenan aki. Despues lo saca mas informacion riba e fechanan exacto y e horario.
