Diadomingo 18 di juli 2021 Rotary Club Aruba lo organisa e di dos “Rotary Container Sales” na Club Kibrahacha 60+ na Piedra Plat. Despues di un benta exitoso siman pasa diadomingo Rotary Club Aruba ta cla pa ricibi e comunidad di Aruba na e di dos “Rotary Container Sales”
Esaki lo tuma luga diadomingo 18 di juli unda lo bende mata, paña, buki, articulo pa cas y mucho mas. Tur e articulonan menciona lo tin un prijs atractivo. Pa evita aglomeracion Rotary Club Aruba lo traha cu un sistema di “drive through” na e “Rotary Container Sales”. E sistema aki ta encera cu lo traha cu “time slots”.Cada “time slots” di 30 minuut lo tin 20 cupo disponibel pa duna espacio pa subi e sitio y scoge articulonan cu lo kier cumpra y despues ta sigui e turno di e siguiente reservacion.
Registracion ta bay solamente via nos Facebook page di Fiesta Rotaria by Rotary Club Aruba. Ariba e pagina social aki bo lo mira un boton cu ta bisa “book now”. Click esaki y kies e diadomingo y orario cu abo ta desea di bin. Despues lo haya un confirmacion di e cita. Si tin cualkier pregunta por haci esaki tambe via nos pagina di Facebook cu lo yuda bo cu bo pregunta.
E prome Rotary Container Sales a tuma luga diadomingo dia 11 di juli y tabata bon bishita pa nos comunidad. Rotary Club Aruba kier a extende un palabra di gradicimento na tur cu a bishita Rotary Container Sales. Diadomingo awo dia 18 di juli e benta lo cuminsa for 9:00 am -3:00 pm na Club Kibrahacha 60+ na Piedra Plat. Sigui pa diadomingo 25 di juli y 1 di augustus.
E invitacion ta keda extende na henter comunidad di Aruba pa bin Rotary Container Sales. Pa bo haya bo oportunidad pa cumpra articulonan di bon calidad na un bon prijs. Y na mesum momento contribui na nos comunidad. Rotary Club Aruba kier a extende un palabra di gradicimento na tur nos sponsor- y colaboradornan cu sin nan sosten y nan confiansa den Rotary Club Aruba e evento aki no lo ta posibel.
