Debi na edad halto di un acusado, fiscal a dicidi di pidi un castigo di apenas 10 luna pa e homber acusa di a mishi dos biaha cu nieta di su casa. Dia 15 di maart awo lo tin decision.
Loke a tuma luga diabierna tabata e tratamento. Eynan pa prome biaha e homber Nelson Thomas di 71 aña a presenta dilanti hues y unda cu el a scucha e acusacion cu tin contra dje.
Den sala tabata presenta dos familiar di e denunciante, e mama y otro persona mas. E ultimo aki na final no por a contene su mes, scuchando e acusado nenga tur cos. “Miho mi a mat’e ora cu mi a haya e chens,” el a expresa den un momento di emocion. Trahadonan di corte a conseh’e pa calma su mes y evita expresionnan asina den sala di corte.
E acusacion cu Ministerio Publico a trece contra dje ta cu na dos ocasion el a mishi cu un mucha muhe di 11 aña. El a mishi (touch) na su pechonan y na su parti intimo, durante e periodo di december, 2021 pa januari, 2023.
Ta resulta cu e victima den e caso aki ta nieta di casa di e acusado. Tur cos a cuminsa lora ora cu e mucha a conta mas cu un maestro kico a pasa cu ne y e cabesante di e scol a bay informa e mayornan.
Den corte despues di a lesa e acusacion, Nelson Thomas a nenga di a comete e echo. Funcionarionan di KZP a interog’e y ey tambe el a nenga di a comete e delito.
Den e declaracion cu tanto e mama como e tata a duna, nan a confronta Thomas cu loke maestronan a informa nan. Y su reaccion tabata cu el a pidi disculpa pa loke a pasa, segun e mayornan. Y a admiti cu el a mishi cu su pechonan pero no e parti intimo.
Hues a bisa cu e mama y e tata a papia cu Thomas y el a pidi pordon pa loke a pasa. El a bisa cu e lo a mishi cu e mucha su pechonan y no su parti intimo (vagina).
Mirando cu e ta nenga hues a puntr’e di con bo a pidi pordon si bo ta nenga.” Aki ta manera cu cosnan a bruha. Y hues tampoco a comprond’e mucho bon ora cu el a bisa cu nan a compronde robes, esta cu e no a pidi pordon.
Tambe hues a puntr’e si e ta dispuesto pa sigui un curso riba e tema aki, esta cu no mester mishi cu menornan di edad. Su contesta tabata “mi lo a haci’e si mi ta culpabel, pero mi no a haci e acto aki. Mi no por bay un curso pa algo cu mi no a haci.”
Pero tin un otro declaracion mas, esta di casa di e mesun acusado. El a bisa cu e homber a admiti cu el a mishi cu e pechonan di e mucha berdad, pero di e parti intimo el a nenga.
Den e caso aki cuater testigo (incluyendo e menor mes) cu ta conta e mesun version cu e acusado ta nenga categoricamente. Pakico e hendenan aki lo mester gaña? Pero e acusado no por a duna un splicacion of contesta. El a keda enfatisa cu nunca e tabata su so cu e mucha. Pero si e drenta su camber mes, e ta sac’e afo bek. “Mi ta un hende grandi, mi no ta bay haci algo asina cu un mucha,” el a bisa.
E homber ta un pensionado kende tabata traha como sub-contratista cu DOW. Pero nan a kit’e for di trabou a base di e sucedido aki. “Esaki pasobra Speed a pone e cos aki den su telefon y a mand’e rond. Tur hende di Aruba a les’e,” el a bisa hues y cu esey ta e motibo cu nan a kit’e.
Banda di esaki, el a conta cu e tin un relacion di hopi tempo caba cu su señora y e ta kere cu tin hende ta jaloers riba nan pa motibo cu nan tin 52 aña casa.
E mama a haci un demanda di casi 4 mil florin pa gastonan relaciona cu tratamento pa su yiu. A resulta cu el a hinca tur recibo den un envelop, manera e abogado a bisa, pero no a yena e formulario.
FISCAL
Pa fiscal no tin nada cu por convence de lo contrario. E pruebanan ta suficiente pa condena e acusado, y e pruebanan tur ta legal y convincente. Aunke cu e homber ta nenga, tin declaracion di e otro personanan cu tur ta similar na loke e victima a declara. Despues cu el a conta e docente cu a informa e mama, e ultimo aki a bay entrega e keho.
E mucha mes a bisa cu e homber a mishi cu su pechonan y a pasa man na su parti intimo dos bes. No tin motibo pa duda.
Esaki ta un tipo di delito cu comunidad en general ta condena fuertemente. Mas den un caso ora cu ta un menor envolvi pasobra e no por defende su mes.
Di otro banda, mester tene cuenta cu edad di e acusado. P’esey el a pidi 20 luna, di cual 10 luna ta condicional y tres aña di prueba.
Pa loke ta e demanda el a bay di acuerdo cu mita di e placa y loke cu a mama a paga caba, el a pidi corte ordena pa Thomas paga esaki bek.
