Diabierna ultimo Corte di Prome Instancia a trata e caso penal contra Albert Ramey Geerman y Calvin Alexander Anthony Kelkboom. E acusacion tabata intento di asesinato pa cual Ministerio Publico a pidi un castigo di 10 aña.
E hecho aki a tuma luga dia 29 di juni aña pasa den bisindario di e cancha di basketball den Village, rond di 5.30 di mainta.Aparentemente e problema tabata entre e gang di Sabana Basora y dos mucha homber di San Nicolas. E problema a cuminsa ya caba mas temperan ora cu e dos gruponan aki a topa otro durante un salida cu a hiba nan na unda tabata Olde Molen.
E problema a cuminsa for di eynan caba cu un tiramento di palabra di un banda pa otro.
E muchanan di San Nicolas bay pariba y a keda “hang out” banda di e barnan na San Nicolas, pero loke nan no a sospecha ta cu e gang di Sabana Basora tambe a subi pariba. Kico a pasa den e momento ey te ora cu e tiramento a tuma lug abanda di e cancha d basketball cu a laga Brandon Wouters sin por cana, ta contradeci otro. E acusado Geerman ta admiti di tabata na San Nicolas, pero ta nenga di a los tiro riba n of mas otro persona. E di dos acusado cu ta Kelkboom ta nenga rotundamente di tabata pariba.
Autoridadnan ta basa nan mes riba filmacion haya for di camara di siguridad di Western Union. Sinembargo Abogado mr. Illes, kende a representa Kelkboom, como tambe Lejuez, ta bisa cu for di e grabacionnan por mira persona pero niun momento por reconoce cu ta e dos acusadonan aki. Mr. Illes a entrega potret saca di e grabacion y a bisa cu e unico cos cu por distingui ta silueta y e mes no ta reconoce su cliente riba e grabacionnan. Fiscal mes a admiti cu e no ta reconoci niun hende, sinembargo e Recherchenan si ta reconoce e dos acusadonan, ya cu a yega di atende cu nan den pasado caba.
Den e tiramento cu tabatin den Village dos hoben a resulta herida, esta Brandon Wouters y Ashton Mentore, kendenan despues di e sucedido a haya ayudo di un bisiña cu a core transporta nan pa IMSAN. Pero loke ta hala atencion den e rapport aki tambe ta cu e dos victimanan na inicio no kier a duna ningun declaracion, of miho bisa cu nan no sa ken e hendenan ta. Sinembargo den un otro declaracion ta admiti di a reconoce Geerman y Kelkboom como e dosnan cu a los tiro riba nan.
E acusadonan a haya un shock, ya cu nan ta persisti di no tabata esnan cu a los tiro y toch Fiswcal a pidi pa declara nan culpabel. Ademas di a los tiro cu intencion di mata, a acusanan tambe di posesion di arma di candela. Na final a pidi un castigo di 10 aña incondicional. Aki tres siman lo tin sentencia den e caso.
